കരിപ്പൂർ വികസനം: ഭൂമിയേറ്റെടുക്കൽ അഞ്ചുമാസത്തിനകം പൂർത്തിയാക്കാൻ ശ്രമം

ആവശ്യമായ തുക വകയിരുത്താനും ധാരണ മലപ്പുറം: കോഴിക്കോട്​ വിമാനത്താവള വികസനത്തിന്​ ഭൂമി ഏറ്റെടുക്കൽ നടപടികൾ വേഗത്തിലാക്കാൻ തീരുമാനം. അഞ്ചുമാസത്തിനകം നടപടികൾ പൂർത്തീകരിക്കാനാണ്​ തിങ്കളാഴ്ച ഓൺലൈൻ വഴി ചേർന്ന ഉന്നതതലയോഗത്തിൽ തീരുമാനിച്ചത്​. കരിപ്പൂരിലെ റൺവേ എൻഡ്​ സേഫ്​റ്റി ഏരിയ (റെസ) നീളം കൂട്ടാൻ​ 18.5 ഏക്കർ ഭൂമിയാണ്​ കേന്ദ്ര വ്യോമയാന മന്ത്രാലയം ആവശ്യപ്പെട്ടത്​. ഭൂമിയേറ്റെടുക്കാൻ കഴിഞ്ഞദിവസം മന്ത്രി വി. അബ്​ദുറഹ്​മാന്‍റെ അധ്യക്ഷതയിൽ യോഗം ചേർന്നിരുന്നു. ഇതിന്​ തുടർച്ചയായാണ്​ ചീഫ്​ സെക്രട്ടറി വി.പി. ജോയിയുടെ അധ്യക്ഷതയിലാണ്​ നടപടികൾ വേഗത്തിലാക്കുന്നത്​ സംബന്ധിച്ച്​ ഉദ്യോഗസ്ഥതല ഉന്നതതലയോഗം ചേർന്നത്​. ​കേന്ദ്രം ആവശ്യപ്പെട്ട ഭൂമി വേഗത്തിൽ കൈമാറാനാവശ്യമായ നടപടികൾ സ്വീകരിക്കാനാണ്​ യോഗതീരുമാനം. 2023 മാർച്ചിനകം ഭൂമി കൈമാറണമെന്നാണ്​ കേന്ദ്രം ആവശ്യപ്പെട്ടത്​. ഗതാഗത വകുപ്പ്​ പ്രിൻസിപ്പൽ സെക്രട്ടറി കെ.ആർ. ജ്യോതിലാൽ, കലക്ടർ വി.ആർ. പ്രേംകുമാർ, റവന്യൂവകുപ്പ്​ ഉദ്യോഗസ്ഥർ, വിമാനത്താവള ഡയറക്ടർ, ഉദ്യോഗസ്ഥർ, വിമാനത്താവള അതോറിറ്റി ആസ്ഥാനത്ത്​ നിന്നുള്ള ഉന്നത ഉദ്യോഗസ്ഥർ എന്നിവർ യോഗത്തിൽ സംബന്ധിച്ചു. കൂടാതെ, ഭൂമി ഏറ്റെടുക്കാനാവശ്യമായ തുക വകയിരുത്താനും തത്ത്വത്തിൽ ധാരണയായിട്ടുണ്ട്​. മുഖ്യമന്ത്രി പിണറായി വിജയൻ അനുകൂല നിലപാടാണ്​ സ്വീകരിച്ചിരിക്കുന്നത്​. ബജറ്റിൽ ഉൾപ്പെടാത്തതിനാൽ പ്രത്യേക പരിഗണന നൽകി ഭൂമി ഏറ്റെടുക്കാനാവശ്യമായ തുക വകയിരുത്തും. ഇക്കാര്യം മുഖ്യമന്ത്രിയും അംഗീകരിച്ചിട്ടുണ്ടെന്നാണ്​ വിവരം. ധനകാര്യവകുപ്പിന്‍റെ അംഗീകാരം കൂടി ലഭിച്ച​ ശേഷമാകും ഉത്തരവിറങ്ങുക. റൺവേയുടെ രണ്ട്​ അറ്റങ്ങളിലായാണ്​ 18.5 ഏക്കർ ഏറ്റെടുക്കുക. പടിഞ്ഞാറ്​ ഭാഗത്തെ റൺവേ പത്തിൽ 11 ഏക്കറും കിഴക്കുവശത്തെ റൺവേ 28ൽ ഏഴര ഏക്കർ ഭൂമിയുമാണ് ഏറ്റെടുക്കേണ്ടത്. സുരക്ഷ നടപടികളു​ടെ ഭാഗമായി റെസ​ 240 മീറ്ററായി വർധിപ്പിക്കണമെന്നാണ്​ സമിതി നിർദേശം​​. റെസ ദീർഘിപ്പിക്കുന്നതോടെ നിലവിലുള്ള 2,860 മീറ്റർ റൺവേ പൂർണമായി ഉപയോഗിക്കാനാകും.