പണിക്ക്​ മുടക്കമില്ല; കെ.എസ്.ആർ.ടി.സി സ്റ്റാൻഡിലെ കെട്ടിടം പൊളിച്ചുനീക്കുന്ന ജോലിക്ക്​ അതിവേഗം

കോട്ടയം: പണിമുടക്കിലും മുടങ്ങാതെ കെ.എസ്.ആർ.ടി.സി സ്റ്റാൻഡിലെ കെട്ടിടം പൊളിക്കൽ ജോലികൾ. തിങ്കളാഴ്ച പണിമുടക്കിനെതുടർന്ന്​ നഗരം നിശ്ചലമായപ്പോൾ, അതിവേഗത്തിലായിരുന്നു ജോലി.​ സർവിസുകളെല്ലാം നിലച്ചത്​ പണിക്ക്​ ഇരട്ടിവേഗവും നൽകി. ​ജെ.സി.ബി ഉപയോഗിച്ച്​ പമ്പിനോട്​ ചേർന്ന ഭാഗത്തെ കെട്ടിടഭാഗങ്ങളാണ്​ തിങ്കളാഴ്ച​ പൊളിച്ചുനീക്കിയത്​. കഴിഞ്ഞ ദിവസങ്ങളിലായി കെട്ടിടത്തിലെ ജനലുകളും കതകുകളുമടക്കമുള്ള തടി ഉരുപ്പടികളെല്ലാം ഉളക്കിമാറ്റിയിരുന്നു. ഭിത്തികൾ പൊളിച്ചുനീക്കുന്ന ജോലികളാണ്​ ഇപ്പോൾ പുരോഗമിക്കുന്നത്​. ഇത്​ ഉടൻ പൂർത്തിയാക്കുമെന്ന്​ കരാർ ഏറ്റെടുത്തവർ പറഞ്ഞു. പൊടി അടക്കമുള്ളവ തടയാൻ കെട്ടിടത്തിനുചുറ്റും മറയടക്കമുള്ളവയും ഒരുക്കിയിട്ടുണ്ട്​. 6.20 ലക്ഷം രൂപക്ക്​ ഇല്ലിക്കൽ സ്വദേശിയാണ്​ കെട്ടിടം പൊളിച്ചുനീക്കുന്നതിനുള്ള കരാർ​ ഏറ്റെടുത്തത്​. 15 ദിവസം കൊണ്ട് ജോലി പൂർത്തിയാക്കണമെന്നാണ്​ കെ.എസ്​.ആർ.ടി.സി നൽകിയിരിക്കുന്ന നിർദേശം. കഴിഞ്ഞ 21നാണ് കെട്ടിടം പൊളിക്കുന്ന ജോലിക്ക്​ തുടക്കമായത്​. പൊളിക്കുന്നതിന്​ മുന്നോടിയായി ഈ കെട്ടിടത്തിൽ പ്രവർത്തിച്ചിരുന്ന സ്റ്റേഷൻ മാസ്റ്റർ ഓഫിസ് അടക്കമുള്ളവ താൽക്കാലികമായി കാന്‍റീൻ പ്രവർത്തിക്കുന്ന കെട്ടിടത്തിന്‍റെ മുകളിലേക്ക്​​ മാറ്റിയിരുന്നു​. ബസുകൾ ഇറങ്ങിപ്പോകാൻ പ്രത്യേക ക്രമീകരണങ്ങളും ഒരുക്കിയിരുന്നു. യാത്രക്കാർക്ക്​ ബസ്​ കാത്തുനിൽക്കാൻ താൽക്കാലിക ഷെഡും​ നിർമിച്ചിട്ടുണ്ട്​. എന്നാൽ, ഇവിടെ നിന്നു​തിരിയാൻ പോലും ഇടമില്ലെന്ന പരാതി ഉയർന്നിട്ടുണ്ട്​. പൊടിശല്യവും രൂക്ഷമാണ്​. മഴപെയ്താൽ ചളി നിറയുമെന്നും യാത്രക്കാർ പറയുന്നു. ബസുകൾ കടന്നുപോകുമ്പോൾ വലിയ തോതിലാണ്​ പൊടി ഉയരുന്നത്​. കനത്ത ചൂടും യാത്രക്കാരെ ബുദ്ധിമുട്ടിക്കുന്നുണ്ട്. ഷെഡിന്‍റെ വശങ്ങളിൽ ബസുകൾ പാർക്ക്​ ചെയ്യുന്നതിനാൽ ബസുകൾ യാത്രക്കാരുടെ ശ്രദ്ധയിൽപ്പെടുന്നില്ലെന്നും ആക്ഷേപമുണ്ട്​. പലപ്പോഴും ബസുകൾ സ്​റ്റാൻഡ് വിടുമ്പോഴാണ് യാത്രക്കാർ അറിയുന്നത്. ബസ്​ കയറാൻ യാത്രക്കാർ നിൽക്കുന്നതിനു പിന്നിലായി മണ്ണെടുത്തിട്ട ഭാഗത്ത് കുഴിയുണ്ട്. ബസുകൾ അടുത്തേക്കുവരുമ്പോൾ യാത്രക്കാർ പെട്ടന്ന്​ പുറകോട്ടുമാറുമ്പോൾ കുഴിയിലേക്ക് വീഴാൻ സാധ്യതയേറെയാണെന്ന്​ ചൂണ്ടിക്കാട്ടപ്പെടുന്നു. സ്റ്റാൻഡിൽ സ്ഥലമില്ലാത്തതിനാൽ ദീർഘദൂര ബസുകൾ റോഡിൽ നിർത്തിയാണ്​ യാത്രക്കാരെ കയറ്റുന്നതും ഇറക്കുന്നതും. ഇത്​ സ്​റ്റാൻഡിനു മുന്നിൽ ഗതാഗതക്കുരുക്കിനും കാരണമാകുന്നു. പഴയ കെട്ടിടം പൊളിച്ചുനീക്കിയശേഷം ഈ സ്ഥലം ടൈലിട്ട്​ നവീകരിച്ച്​ ബസുകളുടെ പാർക്കിങ്​ യാർഡാക്കി മാറ്റാനാണ്​ തീരുമാനം. തിരുവഞ്ചൂർ രാധാകൃഷ്ണൻ എം.എൽ.എയുടെ ആസ്തി വികസന ഫണ്ടിൽനിന്നുള്ള 1.8 കോടി രൂപ ഉപയോഗിച്ചാണ്​ ഇതടക്കമുള്ള നവീകരണം. ഇതിന്‍റെ ഭാഗമായി തിയറ്റർ റോഡിനോടുചേർന്ന് 'എൽ' ആകൃതിയിൽ കാത്തിരിപ്പുകേന്ദ്രവും ഓഫിസും നിർമിക്കും. എന്നാൽ, പുതിയ കെട്ടിടത്തിന്‍റെ പണി ഇഴയുകയാണ്​. മൂന്ന്​ നിലയിൽ പണിയുന്ന കെട്ടിടത്തിന്‍റെ ആദ്യനിലയുടെ നിർമാണം പകുതിമാത്രമാണ്​ ഇതുവരെ പൂർത്തിയായിരിക്കു​ന്നത്​. പഴയ കെട്ടിടം പൊളിച്ചുനീക്കുന്നതിനൊപ്പം പുതിയ കെട്ടിടത്തിന്‍റെ നിർമാണം വേഗത്തിലാക്കുമെന്ന്​ അധികൃതർ പറഞ്ഞു. --പടം DP--