തിരുനക്കര ഉത്സവത്തിന് കൊടിയേറി

കോട്ടയം: തിരുനക്കര മഹാദേവ ക്ഷേത്രത്തിലെ ഉത്സവത്തിന് കൊടിയേറി. താഴമൺ മഠം തന്ത്രി കണ്ഠരര് മോഹനരുടെ മുഖ്യകാർമികത്വത്തിലായിരുന്നു കൊടിയേറ്റ്. മേൽശാന്തി പെരിയമന നാരായണൻ നമ്പൂതിരി സഹകാർമികനായി. നാഗസ്വര-പഞ്ചവാദ്യ മേളങ്ങളോടെ കൊടിയേറിയപ്പോൾ ഭക്തർ ആർപ്പുവിളിച്ചും തളിർ വെറ്റില പറത്തിയും സ്ത്രീകൾ വായ്ക്കുരവയിട്ടും ഉത്സവത്തെ വരവേറ്റു. 23ന് വൈകീട്ട് നാലിന്​ 22 ഗജവീരന്മാർ ചമയങ്ങളോടെ അണിനിരക്കുന്ന പകൽപൂരം നടക്കും. നടൻ ജയറാം പ്രമാണിയായി 111 വാദ്യകലാകാരന്മാരാണ് പൂരത്തിന് മേളം ഒരുക്കുന്നത്. 24 ന് പുലർച്ച ഒന്നിന്​ കിഴക്കേ ഗോപുരവഴിയിലെ ആലിൻചുവട്ടിലാണ് പള്ളിനായാട്ട്. വൈകീട്ട് ആറിന് കാരാപ്പുഴ അമ്പലക്കടവ് ദേവി ക്ഷേത്രക്കുളത്തിലാണ് തേവരുടെ ആറാട്ട്.