തിരമുറിയാതെ ജനപ്രവാഹം; എങ്ങും ചുവന്ന്​ കണ്ണൂർ

കണ്ണൂർ: പയ്യാമ്പലത്തെ കടൽപോലെ തിരമുറിയാതെ നഗരത്തിലേക്ക്​ ജനപ്രവാഹമായിരുന്നു. എവിടെ നോക്കിയാലും ചെ​ങ്കൊടികളും മുദ്രാവാക്യം വിളികളും മാത്രം. അക്ഷരാർഥത്തിൽ ചുവപ്പിന്റെ ആവേശക്കടലായി കണ്ണൂർ. ചെ​​ങ്കൊടി ഏന്തിയ വാഹനങ്ങളിൽ ഞായറാഴ്ച രാവിലെ മുതലേ നഗരത്തിലേക്ക്​ ​പാർട്ടി പ്രവർത്തകരുടെ ഒഴുക്കുതുടങ്ങി. സ്ത്രീകളും കുട്ടികളുമടക്കം സകുടുംബമാണ്​ പ്രവർത്തകർ പൊതുസമ്മേളന നഗരിയിലേക്ക്​​ എത്തിയത്​. തെരുവോരങ്ങളും പൊതുസമ്മേളന നഗരിയായ ജവഹർ സ്​​റ്റേഡിയവും വിപ്ലവഗാനങ്ങളാലും മുദ്രാവാക്യം വിളികളാലും മുഖരിതമായി. നായനാർ അക്കാദമി പരിസരത്തുനിന്നാണ്​ റെഡ് വളന്റിയർ മാർച്ച് ആരംഭിച്ചത്​. തിരഞ്ഞെടുത്ത 1000 പുരുഷ വളന്റിയർമാരും 1000 സ്ത്രീ വളന്റിയർമാരുമടക്കം 2000 പേർ അണിനിരന്നു. റാലിയിൽ ജനറൽ സെക്രട്ടറി സീതാറാം യെച്ചൂരി, മുഖ്യമന്ത്രി പിണറായി വിജയൻ, പി.ബി അംഗം പ്രകാശ്​ കാരാട്ട്​, സംസ്ഥാന സെക്രട്ടറി കോടിയേരി ബാലകൃഷ്ണൻ, പി.ബി അംഗങ്ങളായ വൃന്ദ കാരാട്ട്, സുഭാഷിണി അലി എന്നിവർ ജനങ്ങളെ അഭിവാദ്യം ചെയ്തു. സമാപന സമ്മേളനത്തിനെത്തുന്ന ജനസഞ്ചയം കണക്കിലെടുത്ത് കേന്ദ്രീകൃത പൊതുപ്രകടനം ഒഴിവാക്കിയിരുന്നു. ജില്ലയുടെ വിവിധ ഭാഗങ്ങളിൽ നിന്നുള്ള പ്രവർത്തകൾ നേരിട്ട്​ പൊതുസമ്മേളന നഗരിയിൽ എത്തുകയായിരുന്നു. പാർട്ടിയുടെ കണക്കുകൂട്ടലി​നേക്കാൾ മൂന്നിരട്ടി ജനമായിരുന്നു പൊതുസമ്മേളനത്തിനെത്തിയത്​. ജവഹർ സ്​റ്റേഡിയം നിറഞ്ഞുകവിഞ്ഞതിനെ തുടർന്ന്​ മിക്കവരും പുറത്തുനിന്നാണ്​ നേതാക്കളുടെ പ്രസംഗം ശ്രവിച്ചത്​. പൊലീസിന്‍റെയും പാർട്ടിയുടെയും നേതൃത്വത്തിൽ പാർക്കിങ്ങിനടക്കം ക്രമീകരണങ്ങൾ ഒരുക്കിയിരുന്നുവെങ്കിലും ഉച്ചയോടെ വാഹനങ്ങളുടെ ബാഹുല്യം കാരണം ഗതാഗതക്കുരുക്ക്​ രൂക്ഷമായി. തുടർന്ന്​ പൊതുസമ്മേളന ഭാഗങ്ങളിലേക്കുള്ള വാഹനങ്ങൾ പൊലീസ്​ വഴിതിരിച്ചുവിടുകയായിരുന്നു. പൊതുസമ്മേളനം ജനറൽ സെക്രട്ടറി സീതാറാം യെച്ചൂരി ഉദ്​ഘാടനം ചെയ്തു. മുഖ്യമന്ത്രി പിണറായി വിജയൻ അധ്യക്ഷത വഹിച്ചു. പി.ബി അംഗങ്ങളായ വൃന്ദ കാരാട്ട്​, മണിക്​ സർക്കാർ, മുഹമ്മദ്​ സലീം എന്നിവർ സംസാരിച്ചു. സംസ്ഥാന സെക്രട്ടറി കോടിയേരി ബാലകൃഷ്ണൻ സ്വാഗതം പറഞ്ഞു. ജനപങ്കാളിത്തംകൊണ്ട്​ ചരിത്രം സൃഷ്​ടിച്ചാണ്​ അഞ്ച്​ ദിവസം നീളുന്ന പാർട്ടി കോൺഗ്രസിന്​ സമാപ്തിയായത്​. പടങ്ങൾ -സന്ദീപ്​