ഇടുക്കി മെഡിക്കൽ കോളജ്​: മരുന്നും ജീവനക്കാരുമില്ല; രോഗികൾ വലയുന്നു

ചെറുതോണി: ഇടുക്കി മെഡിക്കൽ കോളജിൽ മരുന്നും ആവശ്യത്തിന്​ ജീവനക്കാരും ഇല്ലാത്തതുമൂലം രോഗികൾ വലയുന്നു. മൂന്ന്​ ക്യൂ തരണം ചെയ്താൽ മാത്രമേ ആശുപത്രിയിലെത്തുന്നവർക്ക്​ ആവശ്യം നടത്തി മടങ്ങാനാകൂ എന്നതാണ്​ അവസ്ഥ. ഇതുമൂലം സ്ത്രീകളും വയോധികരുമടക്കം രോഗികളാണ്​ കൂടുതൽ വലയുന്നത്​. മെഡിക്കൽ കോളജ്​ പ്രവർത്തനം ആരംഭിച്ചിട്ട്​ വർഷങ്ങളായെങ്കിലും അടിസ്ഥാന സൗകര്യം ഒരുക്കുന്നതിൽ അധികൃതർ അനാസ്ഥ തുടരുകയാണ്​. ആദിവാസി, തോട്ടം മേഖലകളിൽന്ന്​ പിന്നാക്ക പ്രദേശങ്ങളിൽനിന്നുമുള്ളവരുടെ പ്രധാന ആശ്രയമാണ്​ ഇടുക്കി മെഡിക്കൽ കോളജ്. രാവിലെ ഒമ്പത്​ മുതൽ ക്യു ആരംഭിക്കും. ജില്ല ആസ്ഥാനത്തെ പല പ്രദേശങ്ങളിൽനിന്ന്​ നടന്നും വാഹനങ്ങളിലും എത്തുന്ന രോഗികൾ ആദ്യത്തെ ക്യൂവിൽ സ്ഥാനം പിടിക്കും. ഇത്​ ടിക്കറ്റെടുക്കാനുള്ളതാണ്​. ടിക്കറ്റെടുത്തവർ രണ്ടാമത്തെ ക്യൂവിൽ നിൽക്കണം. ഡോകടറെ കാണാനുള്ളതാണ് രണ്ടാമത്തെ ക്യൂ. ഡോക്ടറെ കണ്ട് പരിശോധനകൾ കഴിഞ്ഞ് ഡോക്ടർ കുറിച്ചുകൊടുക്കുന്ന മരുന്നുകളുടെ ലിസ്റ്റുമായി മൂന്നാമത്തെ ക്യൂവിലെത്തണം. പൊരിവെയിലത്തും മഴയത്തും മണിക്കൂറുകൾ ക്യൂവിൽനിന്ന്​ ക്ഷീണിച്ച്​ ഫാർമസിയിലെത്തുമ്പോൾ പലപ്പോഴും മറുപടി മരുന്നില്ലെന്നായിരിക്കും. ക്യൂവിൽനിന്ന്​ രോഗികൾ തളർന്നുവീണ സംഭവങ്ങളുമുണ്ട്​. ഇവിടെ മരുന്നെത്തിക്കുന്നത്​ മെഡിക്കൽ സർവിസസ് കോർപറേഷനിൽനിന്നാണ്​. കഴിഞ്ഞ ഒക്ടോബറിൽ അവശ്യമുള്ള മരുന്നുകളുടെ ഓർഡർ കൊടുക്കേണ്ടതായിരുന്നു. അത്​ കൊടുക്കാൻ വൈകി. കഴിഞ്ഞമാസാവസാനമാണ് മരുന്ന്​ വാങ്ങുന്നതിനുള്ള പർച്ചേസ് ഓർഡറുകൾ നൽകിയതെന്നാണ്​ വിവരം. രോഗികളിൽ 90 ശതമാനം വൻതുക കൊടുത്ത്​ പുറത്തുനിന്ന്​ മരുന്നുവാങ്ങാൻ കഴിവില്ലാത്ത സാധാരണക്കാരാണ്. ആവശ്യമായ പാരാമെഡിക്കൽ ജീവനക്കാർ പകുതി മാത്രമേയുള്ളൂ. സ്റ്റാഫ്​ നഴ്​സ്​, നഴ്​സിങ്​ അസി., ഫാർമസി, ലാബ്​, സി.ടി സ്കാൻ, റേഡിയോഗ്രാഫി, എക്​സ്​റേ വിഭാഗങ്ങളിലെല്ലാം ജീവനക്കാരുടെ കുറവുണ്ട്​. സ്റ്റാഫ്​ നഴ്​സുമാർ 39പേരും നഴ്​സിങ്​ അസിസ്റ്റന്‍റുമാർ 23 പേരും കുറവാണ്​. റേഡിയോ​ഗ്രാഫർ 12 പേരുണ്ടായിരുന്നത്​ ഏഴായി കുറഞ്ഞു. ഇ.സി.ജിയിൽ അഞ്ചുപേരുണ്ടായിരുന്നത്​ രണ്ടായി. ലാബിൽ മൂന്ന്​ ജീവനക്കാരുടെ കുറവുണ്ട്​. ആവശ്യത്തിന്​ ജീവനക്കാരില്ലാത്തതിനാൽ പല വിഭാഗങ്ങളുടെയും പ്രവർത്തനം ഭാഗികമായി ചുരുക്കിയിരുന്നു. ചിത്രം TDL medical college: മെഡിക്കൽ കോളജിൽ ടിക്കറ്റെടുക്കാൻ നിൽക്കുന്നവരുടെ നിര