ഓഫിസിലെന്താ മയിലിന് കാര്യം...

ഫോർട്ട്കൊച്ചി: കൊച്ചി നഗരസഭയുടെ ഫോർട്ട്കൊച്ചി സോണൽ ഓഫിസിൽ വിരുന്നെത്തിയിരിക്കുകയാണ് അമ്മ മയിലും മൂന്ന് കുഞ്ഞുങ്ങളും. ഒരാഴ്ചയോളം പ്രായമുള്ള മയിൽ കുഞ്ഞുങ്ങൾ അമ്മയോടൊപ്പം സോണൽ ഓഫിസ് ചുറ്റുവളപ്പിൽ കഴിഞ്ഞു കൂടുകയാണ്.

നാല് കുഞ്ഞുങ്ങളുമായി സോണൽ എത്തിയതാണ്. എന്നാൽ, ഒരു കുഞ്ഞിനെ നായോ മറ്റോ കടിച്ചതിനെ തുടർന്ന് ചത്തുവെന്നാണ് ജീവനക്കാർ പറയുന്നത്. തുടർന്ന് രാത്രി ഇവർക്ക് സുരക്ഷിതമായി കഴിയുന്നതിന് ജീവനക്കാർ തന്നെ ഒഴിഞ്ഞുകിടക്കുന്ന റവന്യൂ വിഭാഗം മുറി കൊടുത്തിരിക്കയാണ്.

പകൽ ഓഫിസ് വളപ്പിലാണ് ഇവയുള്ളത്. വനം വകുപ്പിൽ വിവരം അറിയിച്ചിട്ടുള്ളതായി ജീവനക്കാർ പറഞ്ഞു. ഏതായാലും കൊച്ചി കാണാനെത്തുന്ന സഞ്ചാരികൾക്കും നാട്ടുകാർക്കും മനോഹരകാഴ്ചയായി മാറിയിരിക്കയാണ് ഇവ.