അഞ്ചര കിലോ കഞ്ചാവുമായി താണ്ടിയത്​ അഞ്ച്​ ചെക്​പോസ്​റ്റ്​, പിടിയിലായത്​ എറണാകുളത്ത്​

കൊച്ചി: അഞ്ചരക്കിലോ കഞ്ചാവുമായി അഞ്ച്​ ചെക്​പോസ്​റ്റുകൾ കടന്ന്​ കേരളത്തിൽ എത്തിയ തമിഴ്​നാട്​ സ്വദേശി അവസാനം എറണാകുളം എക്​സൈസ്​ സർക്കിൾ സംഘത്തി​െൻറ പിടിയിൽ. കടലൂർ തിട്ടകുടി താലൂക്കിൽ പാളയം വില്ലേജിൽ അക്കന്നൂർ ദേശത്ത് 75 മെയിൻ റോഡിൽ ശങ്കരനാരായണ സ്വാമിയാണ്​ (43) ശനിയാഴ്​ച രാവിലെ 9.50ന് എറണാകുളം നോർത്ത് എം.​െഎ ഷാനവാസ് റോഡിൽനിന്ന്​ അറസ്​റ്റിലായത്​. ഇയാളിൽ നിന്ന്​ 5.580 കിലോ കഞ്ചാവ്​ കണ്ടെടുത്തു. മൊബൈൽ ഫോണ​ും പിടികൂടി.

ഒരാഴ്ചമുമ്പ് പ്രതി കഞ്ചാവ് വാങ്ങാൻ ആന്ധ്രയിലേക്ക് പോയ വിവരം എക്​സൈസ്​ സി.ഐ അൻവർ സാദത്തിന് ലഭിച്ചിരുന്നു. വെള്ളിയാഴ്​ച രാവിലെ നോർത്ത് റെയിൽവേ സ്​റ്റേഷനിൽ ട്രെയിൻ ഇറങ്ങിയെന്നും അറിഞ്ഞു. എറണാകുളം ജില്ലയിലെ വിവിധ ഭാഗങ്ങളിലും കൊല്ലം കാവനാട്ടും ഇയാൾ മീൻ പിടിക്കാൻ തൊഴിലാളികൾക്ക്​ ഒപ്പം പോകാറുണ്ട്. 18,000 രൂപക്ക്​ വാങ്ങുന്ന കഞ്ചാവ് 1,30,000 രൂപക്കാണ് എറണാകുളം നോർത്ത്, തൃക്കാക്കര, കടവന്ത്ര എന്നീ സ്ഥലങ്ങളിൽ വിൽക്കുന്നത്. രണ്ടുദിവസം മുമ്പാണ്​ കഞ്ചാവ്​ വാങ്ങിയതെന്നും ആന്ധ്ര മുതൽ സേലം വരെ ബസിലാണ്​ വന്നതെന്നും പ്രതി വെളിപ്പെടുത്തി. ബസിലെ കണ്ടക്ടറിന് ഇത് കഞ്ചാവാണെന്ന് മനസ്സിലായപ്പോൾ 500 രൂപ നൽകി ഒതുക്കി.

അന്തർസംസ്ഥാന തൊഴിലാളികളെ ഉപയോഗിച്ചാണ്​ ഇവിടെ കഞ്ചാവ് കച്ചവടം. ഒരു പൊതിക്ക്​ 100 രൂപയാണ് കമീഷൻ നൽകുന്നത്. ആന്ധ്രയിലെ നക്സലൈറ്റുകളിൽനിന്നാണ്​ കഞ്ചാവ്​ വാങ്ങുന്നത്​. ആവശ്യക്കാരെ ബൈക്കിലെത്തി വനത്തിലേക്ക് കൂട്ടിക്കൊണ്ടുപോയി ഉൾവനത്തിലെത്തിച്ചാണ്​ ഇടപാട്​​.

ആന്ധ്രയിലെ ചിന്താപള്ളി ബസ്​സ്​റ്റാൻഡിലെ ഏജൻറുമാർ വഴിയാണ്​ നക്​സ​ലൈറ്റുകളിലേക്ക്​ എത്തുന്നതെന്നും പ്രതി അന്വേഷണസംഘത്തോട്​ പറഞ്ഞു​. പ്രതിയെ പിടികൂടിയ എക്​സൈസ്​ സംഘത്തിൽ പ്രിവൻറിവ് ഓഫിസർ ടി.എം. വിനോദ്, സി.ഇ.ഒമാരായ അനസ്, റെനി, ദീപു തോമസ്, ജയിംസ് എന്നിവരും ഉണ്ടായിരുന്നു.