പ്രവാചകനിന്ദ; മഹല്ല്​ കൂട്ടായ്മ നേതൃത്വത്തിൽ തിങ്കളാഴ്​ച പ്രതിഷേധ മാർച്ച്​

കൊച്ചി: പ്രവാചകനിന്ദ​ക്കെതിരെ ഉയരുന്ന പ്രതിഷേധങ്ങളുടെ ഭാഗമായി ജില്ല മഹല്ല്​ കൂട്ടായ്മയുടെ നേതൃത്വത്തിൽ 13ന്​ ബി.എസ്​.എൻ.എൽ എക്സ്​ചേഞ്ചിലേക്ക്​ മാർച്ച്​ നടത്തും. ബി.ജെ.പിയുടെ ദേശീയ നേതാക്കൾ പ്രവാചകനെതിരെ നടത്തിയ അധിക്ഷേപം പൊറുക്കാൻ പറ്റാത്തതാണെന്നും ശക്തമായ പ്രതിഷേധ ഉയർന്നുവരുമെന്നും മഹല്ല്​ കൂട്ടായ്മ ഭാരവാഹികൾ പറഞ്ഞു. മാർച്ചിന്‍റെ മുന്നോടിയായി വെള്ളിയാഴ്ച മഹല്ല്​, ജുമാമസ്​ദിജ്​ കേന്ദ്രീകരിച്ച്​ ജുമുഅ നമസ്കാരത്തിന്​ ശേഷം പ്രതിഷേധ സംഗമങ്ങൾ സംഘടിപ്പിക്കും. പ്രതിഷേധ മാർച്ച്​ മേനക പരിസരത്തുനിന്ന്​ ആരംഭിക്കുമെന്നും ജില്ലയിലെ 430ൽപരം മഹല്ലുകൾക്ക്​ കീഴിൽനിന്ന്​ ആളുകൾ പ​ങ്കെടുക്കുമെന്നും മഹല്ല്​ കൂട്ടായ്മ ഭാരവാഹികൾ വാർത്തസമ്മേളനത്തിൽ അറിയിച്ചു. ജില്ല മഹല്ല്​ കൂട്ടായ്മ ചെയർമാൻ മുഹമ്മദ്​ വെട്ടത്ത്​, മഹല്ല്​ കൂട്ടായ്മ രക്ഷാധികാരി അബൂബക്കർ അഹ്​സനി, കൂട്ടായ്മയുടെ മറ്റൊരു രക്ഷാധികാരി അർഷദ്​ ബദരി, മഹല്ല്​ കൂട്ടായ്മ വർക്കിങ്​​ ചെയർമാൻ ഷരീഫ്​ പുത്തൻപുര, മഹല്ല്​ കൂട്ടായ്മ ചീഫ്​ കോഓഡിനേറ്റർ ടി.എ. മുജീബ്​ റഹ്മാൻ തച്ചവള്ളത്ത്, മഹല്ല്​ കൂട്ടായ്മ ജനറൽ സെക്രട്ടറി സി.കെ. അമീർ ​എന്നിവർ സംസാരിച്ചു.