അബ്കാരി കേസിൽ അറസ്റ്റിലായ ആന്റോ അഗസ്റ്റിൻ
ആന്റോ അഗസ്റ്റിന് തിരിച്ചടി; ഇടക്കാല ജാമ്യം നൽകാനാകില്ലെന്ന് ഹൈകോടതി
കൊച്ചി/കൽപറ്റ: വയനാട്ടിലെ വീട്ടിൽനിന്ന് അളവിൽ കൂടുതൽ മദ്യം കണ്ടെടുത്തതുമായി ബന്ധപ്പെട്ട കേസിൽ പ്രതിയായ റിപ്പോർട്ടർ ചാനൽ ഉടമ ആന്റോ അഗസ്റ്റിന്‍റെ ജാമ്യ ഹരജി ഹൈകോടതി ചൊവ്വാഴ്ച പരിഗണിക്കാൻ മാറ്റി. ഇതോടെ ആന്റോ മാനന്തവാടി ജില്ല ജയിലിൽതന്നെ തുടരും. വ്യാഴാഴ്ച അറസ്റ്റിലായ ആന്‍റോയുടെ ജാമ്യ ഹരജി സുൽത്താൻ ബത്തേരി മജിസ്ട്രേറ്റ് കോടതി ഇന്നലെ തള്ളിയതിനു പിന്നാലെ ആന്റോ ഹൈകോടതിയിൽ നൽകിയ ഹരജിയാണ് ജസ്റ്റിസ് കൗസർ എടപ്പഗത്ത് പരിഗണിച്ചത്. സർക്കാറിന്‍റെ വിശദീകരണം തേടിയ കോടതി, മദ്യക്കുപ്പികൾ പിടിച്ചെടുത്ത വീടിന്‍റെ ഉടമസ്ഥാവകാശം സംബന്ധിച്ച് തർക്കമുള്ളതിനാൽ കൂടുതൽ രേഖകൾ ഹാജരാക്കാനും നിർദേശം നൽകി.
വിദേശമദ്യവും വൈനും കണ്ടെത്തിയ മുട്ടിൽ സൗത്ത് വില്ലേജിലെ കെട്ടിടം തന്‍റേതല്ലെന്നു ചൂണ്ടിക്കാട്ടിയാണ് ഹരജി നൽകിയത്. ബാങ്ക് വായ്പ തിരിച്ചടക്കാത്തതിനെ തുടർന്ന് ഈ വസ്തു ലേലം ചെയ്തിരുന്നു. ലില്ലി ജോസ് എന്ന വ്യക്തിയാണ് അന്ന് വീട് ലേലത്തിൽ പിടിച്ചത്. നാലു വർഷം മുമ്പ് കൈമാറിയ കെട്ടിടത്തിൽ നടന്ന കാര്യങ്ങൾക്ക് താൻ ഉത്തരവാദിയല്ലെന്നാണ് ഹരജിയിലെ വാദം. ഉടമസ്ഥാവകാശം തെളിയിക്കാൻ ഹരജിക്കാരൻ കെട്ടിട നികുതിയടച്ച രേഖ പ്രോസിക്യൂഷൻ ഹാജരാക്കി. എന്നാൽ, വീട് ലേലവുമായി ബന്ധപ്പെട്ട സർട്ടിഫിക്കറ്റിനാണ് കെട്ടിട നികുതി രസീതിനെക്കാൾ നിയമ സാധുതയെന്ന വാദം പ്രതിഭാഗം ഉന്നയിച്ചു.
പിടിച്ചെടുത്ത മദ്യം വിൽപനക്ക് സൂക്ഷിച്ചതാണെന്ന് തെളിയിക്കാൻ രേഖകളില്ല. അനുവദനീയ അളവിൽ കൂടുതൽ മദ്യം കൈവശം വെക്കുന്നത് ജാമ്യം ലഭിക്കാവുന്ന കുറ്റമാണെന്നും ഇക്കാര്യങ്ങളൊന്നും പരിഗണിക്കാതെയാണ് മജിസ്ട്രേറ്റ് കോടതി ജാമ്യം തള്ളിയതെന്നും ഹരജിക്കാരൻ വാദിച്ചു.
എന്നാൽ, പ്രതിയെ കസ്റ്റഡിയിൽ വാങ്ങാൻ അന്വേഷണ സംഘം സമർപ്പിച്ച അപേക്ഷ ബത്തേരി വിചാരണ കോടതി ശനിയാഴ്ച പരിഗണിക്കുന്നതടക്കം സർക്കാറിനുവേണ്ടി ചൂണ്ടിക്കാട്ടിയ പ്രോസിക്യൂഷൻ ഡയറക്ടർ ജനറൽ ടി. ആസഫലി ജാമ്യ ഹരജിയെ ശക്തമായി എതിർത്തു. തുടർന്നാണ് കൂടുതൽ തെളിവുകൾ ഹാജരാക്കാൻ നിർദേശിച്ച് ഹരജി മാറ്റിയത്.
കസ്റ്റഡിയിൽ ആവശ്യപ്പെടുന്നതിന്റെ ഭാഗമായി സുൽത്താൻ ബത്തേരി ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതി കോടതിയിൽഎക്‌സൈസ് പ്രൊഡക്ഷൻ വാറണ്ട് സമർപ്പിച്ചിട്ടുണ്ട്. ഇത് പരിഗണിച്ച കോടതി ശനിയാഴ്ച ആന്റോയെ ഹാജരാക്കാൻ നിർദേശം നൽകി. ചോദ്യംചെയ്യലിനും മറ്റുമായി നാല് ദിവസത്തേക്ക് കസ്റ്റഡിയിൽ ചോദിക്കാനാണ് എക്‌സൈസ് വകുപ്പിന്റെ തീരുമാനം. വ്യാഴാഴ്ച റിമാൻഡ് ചെയ്തപ്പേൾ ജാമ്യാപേക്ഷ വെള്ളിയാഴ്ച പരിഗണിക്കാമെന്നാണ് കോടതി പറഞ്ഞിരുന്നത്. വെള്ളിയാഴ്ച കോടതി നടപടിക്രമങ്ങൾ തുടങ്ങി ഒന്നാമതായി പരിഗണിച്ചുവെങ്കിലും ഉടൻ ജാമ്യാപേക്ഷ തള്ളുകയായിരുന്നു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.