അവസാന നാളുകളിൽ ഭാര്യ മാത്രമേ കൂടെയുണ്ടാകൂവെന്ന് കോടതി; 88 കാരിയായ ഭാര്യയെ കുത്തിപ്പരിക്കേൽപിച്ച 91കാരന്​ ജാമ്യം

കൊച്ചി: 88 കാരിയായ ഭാര്യയെ കുത്തിപ്പരിക്കേൽപിച്ച 91 കാരനായ ഭർത്താവിന്​ ​ഹൈകോടതി ജാമ്യം അനുവദിച്ചു. ഭർത്താവിന് മറ്റ് സ്ത്രീകളുമായി ബന്ധമുണ്ടെന്ന്​ ആരോപിച്ച്​ നിരന്തരം ബുദ്ധിമുട്ടിച്ചതിനെത്തുടർന്ന്​​ ഭാര്യയെ കത്തികൊണ്ട് കുത്തി ഗുരുതരമായി പരിക്കേൽപിച്ച കേസിൽ മാർച്ച്​ 21മുതൽ ജയിലിൽ കഴിയുന്ന 91കാരനാണ്​ ജസ്റ്റിസ് പി.വി. കുഞ്ഞികൃഷ്ണൻ ഉപാധികളോടെ ജാമ്യം അനുവദിച്ചത്​.

വധശ്രമം അടക്കമുള്ള കുറ്റങ്ങൾ ചുമത്തി പുത്തൻകുരിശ്​ പൊലീസ്​ രജിസ്റ്റർ ചെയ്ത കേസിലെ പ്രതിയാണ്​ ഹരജിക്കാരൻ. സെഷൻസ്​ കോടതി ജാമ്യം നിഷേധിച്ചതിനെ തുടർന്നാണ് ഹൈകോടതിയെ സമീപിച്ചത്.

അവസാന നാളുകളിൽ ഭാര്യ മാത്രമേ കൂടെയുണ്ടാകൂവെന്ന്​ ഓർക്കണമെന്നും ഇരുവരും ഒരുമിച്ച് ജീവിത ഇന്നിങ്സ്​ സന്തോഷത്തോടെ പൂർത്തിയാക്കട്ടെയെന്നും ഉത്തരവിൽ കോടതി ആശംസിച്ചു​. ഭാര്യയാണ് തന്‍റെ കരുത്തെന്ന് ഹരജിക്കാരനും ഭർത്താവാണ് ശക്തിയെന്ന് ഭാര്യയും മനസ്സിലാക്കണം. എല്ലാം തികഞ്ഞ ദമ്പതികളുടെ ചേർച്ചയിലല്ല, ഭിന്നതകൾ ആസ്വദിച്ച്​ കഴിയുന്നവരിലാണ്​ മികച്ച ദാമ്പത്യം നിലകൊള്ളുന്നത്​. പ്രായം ഇരുവരുടെയും സ്നേഹത്തിന്‍റെ മാറ്റുകൂട്ടിയതിനാലാണ് 88 കാരിയായ ഭാര്യ ഭർത്താവിനെ നിരന്തരം നിരീക്ഷിക്കുന്നത്. എൻ.എൻ. കക്കാടിന്‍റെ ‘സഫലമീ യാത്ര’ എന്ന കവിത ഉദ്ധരിച്ച കോടതി ഭാര്യയോടുള്ള സ്നേഹം വെളിപ്പെടുത്തുന്ന ഈ കവിത തന്‍റെ അവസാന നാളിലാണ്​ കവി രചിച്ചതെന്നും ചൂണ്ടിക്കാട്ടി.

50,000 രൂപയുടെ സ്വന്തവും സമാന തുകക്കുള്ള മറ്റ്​ രണ്ടുപേരുടെയും ബോണ്ട്​ കെട്ടിവെക്കണമെന്ന ഉപാധിയിലാണ്​ ജാമ്യം അനുവദിച്ചത്​.