റഫാൽ ഇടപാട്​: സുപ്രീംകോടതി അടുത്ത ആഴ്​ച പരിഗണിക്കും

ന്യൂഡൽഹി: ഇന്ത്യ- ഫ്രാൻസ്​ റഫാൽ പോർ വിമാന ഇടപാട്​ സ്​റ്റേ ചെയ്യണമെന്നാവശ്യപ്പെട്ട്​ നൽകിയ പൊതുതാൽപര്യ ഹരജിയിൽ വാദം കേൾക്കുമെന്ന്​ സുപ്രീംകോടതി. വിവാദ ഇടപാട്​ റദ്ദാക്കണമെന്നാവശ്യപ്പെട്ട്​ അഭിഭാഷകനായ മനോഹർ ലാൽ ശർമ്മ നൽകിയ ഹരജിയിൽ അടുത്ത ആഴ്​ച വാദം കേൾക്കുമെന്ന്​ സുപ്രീംകോടതി വ്യക്തമാക്കി.

ചീഫ് ജസ്റ്റിസ് ദീപക്​ മിശ്ര, ജസ്​റ്റീസുമാരായ എ.എം ഖാൻവിൽക്കർ, ഡി.വൈ. ചന്ദ്രചൂഡ്​ എന്നിവരടങ്ങിയ ബെഞ്ചാണ്​ ഹരജി പരിഗണിക്കാൻ തീരുമാനിച്ചത്​. അടിയന്തര പ്രാധാന്യമുള്ള പട്ടികയിൽ ഉൾപ്പെട​ുത്തി അടുത്ത ആഴ്​ച തന്നെ വാദം കേൾക്കുമെന്നും കോടതി അറിയിച്ചു.

യുദ്ധവിമാന ഇടപാടിൽ നിരവധി ക്രമക്കേടുകൾ പുറത്തുവന്ന സാഹചര്യത്തിൽ കരാർ റദ്ദാക്കണമെന്നാണ്​ ഹരജിയിൽ ആവശ്യപ്പെടുന്നത്​.

റഫാൽ കരാറിൽ വൻ അഴിമതി നടന്നെന്ന്​ കോൺഗ്രസ്​ അധ്യക്ഷൻ രാഹുൽ ഗാന്ധി ആരോപിച്ചിരുന്നു. യു.പി.എ ഭരണകാലത്ത്​ ഒപ്പുവെച്ച കരാറിനേക്കാൾ വൻതുകയാണ്​ ബി.ജെ.പി സർക്കാർ ഇടപാടിനായി നൽകുന്നതെന്നും ​സാമ്പത്തിക ക്രമക്കേട്​ നടന്നിട്ട​ു​െണ്ടന്നും രാഹുൽ ആരോപിച്ചിരുന്നു.