കർഷക പ്രക്ഷോഭം: കേന്ദ്രവും കർഷക നേതാക്കളും തമ്മിൽ ചർച്ച തുടങ്ങി

കർഷകരുടെ കഴുത്തൊടിച്ച്​ കേന്ദ്ര സർക്കാർ നടപ്പാക്കിയ മൂന്നു കാർഷിക നിയമങ്ങളും പിൻവലിക്കാനാവശ്യപ്പെട്ട്​ ആഴ്​ചകളായി തുടരുന്ന പ്രക്ഷോഭത്തി​െൻറ തുടർച്ചയായി കർഷക നേതാക്കളും കേന്ദ്ര പ്രതിനിധികളും തമ്മിലെ ചർച്ച ആരംഭിച്ചു. കഴിഞ്ഞ വർഷം ആറു തവണ നടന്ന ചർച്ചകളും പൂർണ ഫലം കണ്ടിരുന്നില്ല. ഈ വർഷത്തെ ആദ്യത്തെ ചർച്ചയാണ്​ ഡൽഹി വിജ്​ഞാൻ ഭവനിൽ തുടരുന്നത്​.

ഡിസംബർ 30ന്​ നടന്ന ചർച്ചയിൽ രണ്ടു കാര്യങ്ങളിൽ ഇരു വിഭാഗങ്ങളും ധാരണയിലെത്തിയിരുന്നു. എന്നാൽ, മൂന്നു നിയമങ്ങളും പിൻവലിക്കുകയും നിശ്​ചിത താങ്ങുവില പ്രഖ്യാപിക്കുകയും ചെയ്യാതെ സമരം ഉപേക്ഷിക്കാനില്ലെന്ന്​ കർഷകർ ശക്​തമായ നിലപാടെടുത്തതോടെ അഞ്ചു മണിക്കൂർ നീണ്ട ചർച്ച സമവായമി​ല്ലാതെ പിരിഞ്ഞു.

ഇത്തവണയും തങ്ങളുടെ നിലപാട്​ കൃത്യമാണെന്നും നിയമം പിൻവലിക്കലാണ്​ ഒന്നാമത്തെ ആവശ്യ​െമന്നും കർഷകർ അറിയിച്ചിരുന്നു. ചർച്ച പരാജയപ്പെട്ടാൽ മാളുകളും പെട്രോൾ പമ്പുകളും അടച്ചിട്ട്​ പ്രതിഷേധം കനപ്പിക്കുമെന്നും കർഷകർ വ്യക്​തമാക്കിയിട്ടുണ്ട്​. പ്രതിഷേധം കൂടുതൽ കനക്കുമെന്ന ഭീഷണി നിലനിൽക്കുമെന്നതിനാൽ അനുനയത്തി​െൻറ വഴി തേടുകയാണ്​ സർക്കാർ.

അതിനിടെ, ചില സംസ്​ഥാനങ്ങളിൽ കർഷകർക്കെതിരെ സർക്കാറുകൾ നടത്തുന്ന അക്രമം പ്രതിഷേധങ്ങൾക്കിടയാക്കിയിട്ടുണ്ട്​. രാജസ്​ഥാനിൽനിന്നെത്തിയ കർഷകർക്കുനേരെ ഹരിയാനയിൽ പൊലീസ്​ കണ്ണീർവാതകം പ്രയോഗിച്ചതാണ്​ ഏറ്റവും ഒടുവിലെ സംഭവം.