​പഴുതടക്കാൻ ബി.ജെ.പി; എം.എൻ.എസും മഹായൂത്തിയിലേക്ക്

മുംബൈ: തെരഞ്ഞെടുപ്പ്​ പ്രഖ്യാപിച്ചിട്ടും മഹാരാഷ്ട്രയിൽ ഇരുപക്ഷത്തും സീറ്റുവിഭജന ചർച്ചകൾ പൂർത്തിയായില്ല. രാജ്​ താക്കറെയുടെ മഹാരാഷ്ട്ര നവനിർമാൺ സേന​യെ (എം.എൻ.എസ്​) ഒപ്പംകൂട്ടാനുള്ള തിരക്കിട്ട ചർച്ചയിലാണ്​ ഭരണപക്ഷമായ ശിവസേന (ഷിൻഡെ), എൻ.സി.പി (അജിത്​), ബി.ജെ.പി സഖ്യ മഹായൂത്തി. ഡൽഹിയിൽ അമിത്​ ഷാ-രാജ്​ താക്കറെ ചർച്ചയോടെ ധാരണയായെങ്കിലും സീറ്റുകൾ സംബന്ധിച്ച ചർച്ചകൾ പുരോഗമിക്കുന്നു​. ഒരു സീറ്റ്​ നൽകാൻ ബി.ജെ.പി തയാറാണ്​. എന്നാൽ, മകൻ അമിത്​ താക്കറെക്കുൾപ്പെടെ മൂന്നു സീറ്റുകളാണ്​ രാജിന്റെ ആവശ്യം​. മുംബൈ, പുണെ, നാസിക് എന്നിവിടങ്ങളിലെ മറാത്തി, ഹിന്ദുത്വ വോട്ടുകളാണ്​ ഇവരിലൂടെ ബി.ജെ.പി ലക്ഷ്യമിടുന്നത്​. രാജുമായുള്ള ചർച്ചകളിൽ അജിത്​ പക്ഷമില്ല. കേന്ദ്രമന്ത്രി നിതിൻ ഗഡ്​കരി, പങ്കജ മുണ്ടെ ഉൾപ്പെടെ 20 പേരുടെ സ്ഥാനാർഥിപ്പട്ടിക ബി.ജെ.പി പ്രഖ്യാപിച്ചെങ്കിലും സഖ്യങ്ങൾക്കുള്ള സീറ്റ്​ വിഭജനം നീളുന്നു​.

പ്രതിപക്ഷത്ത്​ മഹാ വികാസ്​ അഘാഡിയുമായി (എം.വി.എ) പ്രകാശ്​ അംബേദ്​കറുടെ വഞ്ചിത്​ ബഹുജൻ അഘാഡി (വി.ബി.എ) വിലപേശൽ തുടരുകയാണ്​. നാലു സീറ്റ്​ നൽകാൻ എം.വി.എ തയാറാണ്​. എന്നാൽ, പ്രകാശിന്​​ ആറു​ സീറ്റ്​ വേണം. അതേസമയം, 20 സീറ്റുകളിൽ കോൺഗ്രസ്​ സ്ഥാനാർഥികളെ തീരുമാനിച്ചതായാണ്​ റിപ്പോർട്ട്​. 2019ൽ ബി.ജെ.പി 23, ശിവസേന 18, എൻ.സി.പി നാല്​, കോൺഗ്രസ്​ ഒന്ന്​, ഓൾ ഇന്ത്യ മജ്​ലിസെ ഇത്തിഹാദുൽ മുസ്​ലിമീൻ (മജ്​ലിസ്​ പാർട്ടി) ഒന്ന്​, സ്വതന്ത്ര ഒന്ന്​ എന്നിങ്ങനെയായിരുന്നു വിജയം. അതേസമയം, മുൻ കേന്ദ്ര ആഭ്യന്തര മന്ത്രി സുശീൽകുമാർ ഷിൻഡെയുടെ മകൾ പ്രണതി ഷിൻഡെ (സോലാപുർ ), മറാത്ത ചക്രവർത്തി ശിവജിയുടെ പിന്മുറക്കാരൻ ഛത്രപതി സാഹു മഹാരാജ് (കോലാപുർ ) അടക്കം ഏഴു സീറ്റിൽ കോൺഗ്രസ് സ്ഥാനാർഥികളെ പ്രഖ്യാപിച്ചു.

സാഹു മഹാരാജ് ആരുടെ സ്ഥാനാർഥിയാകണമെന്നതിൽ കോൺഗ്രസ്​-ഉദ്ധവ്​ പക്ഷ ശിവസേനക്കുമിടയിൽ തർക്കമുണ്ട്​. രാഷ്ട്രീയരംഗത്തില്ലെങ്കിലും പാർട്ടിയോട്​ ആഭിമുഖ്യമുള്ളതിനാൽ കോൺഗ്രസ് അദ്ദേഹത്തിന്റെ സ്ഥാനാർഥിത്വം പ്രഖ്യാപിച്ചെങ്കിലും തർക്കം തുടരുന്നു. ഉദ്ധവ്​ താക്കറെ അദ്ദേഹത്തെ നേരിൽ കാണുകയും ചെയ്തു.

നിലവിൽ സിറ്റിംഗ് എം.എൽ.എയായ വികാസ് താക്കറയെ നാഗ്പുരിൽ ബിജെപി കേന്ദ്ര മന്ത്രി നിതിൻ ഗഡ്കരിക്കെതിരെ മത്സരിപ്പിക്കുമെന്നും സൂചനയുണ്ട്.