സ്​കൂട്ടർ ഓടിച്ച യുവാവിനെ പിന്നിലിരുന്നയാൾ കഴുത്തറുത്ത്​ ​കൊന്നു; കൊല്ലപ്പെട്ടയാൾ പോക്​​സോ കേസ്​ പ്രതി

ഹൈദരാബാദ്: സ്കൂട്ടർ ഓടിച്ച യുവാവിനെ പിന്നിലിരുന്ന്​ യാത്ര ചെയ്​തിരുന്നയാൾ കഴുത്തറുത്ത് കൊന്നു. ഹൈദരാബാദിലെ ഫലക്നുമയിലെ ജഹനുമയിൽ ഞായറാഴ്ചയാണ്​ സംഭവം. ഓട്ടോ ഡ്രൈവറും പോക്​സോ കേസ്​ പ്രതിയുമായ അബ്​ദുൽ ഷാരൂഖ് (24) ആണ് കൊല്ലപ്പെട്ടത്. കൊല ചെയ്തയാളെ ഇതുവരെ തിരിച്ചറിഞ്ഞിട്ടില്ലെന്ന്​ ഫലക്നുമ ഇൻസ്പെക്ടർ ആർ. ദേവേന്ദർ പറഞ്ഞു.

ഞായറാഴ്ച ഉച്ചക്ക്​ 12.30ന്​ ഫലക്നുമയിലെ ജഹനുമ വാട്ടർ ടാങ്കിനടുത്തുള്ള തെരുവിലാണ്​ കൊലപാതകം നടന്നത്. സ്കൂട്ടർ ഓടിച്ച് വരികയായിരുന്ന ഷാരൂഖിനെ പിന്നിലിരുന്നയാൾ കത്തി കൊണ്ട് കഴുത്തറുത്ത് കൊലപ്പെടുത്തുകയായിരുന്നു. കഴുത്തിൽ മാരകമായി മുറിവേറ്റ ഷാരൂഖ് സ്കൂട്ടറിൽ നിന്നിറങ്ങി ഓടിരക്ഷപ്പെടാൻ ശ്രമിച്ചെങ്കിലും ഏതാനും ദൂരം പിന്നിട്ടശേഷം നിലത്തുവീണ് രക്തം വാർന്ന് മരിച്ചു. ഷാരൂഖ് മരിച്ചെന്ന് ഉറപ്പാക്കിയ ശേഷമാണ്​ കൊലപാതകി സംഭവസ്ഥലത്തുനിന്ന് പോയത്​.

വിവരമറിഞ്ഞ് സ്ഥലത്തെത്തിയ പൊലീസ് തിരിച്ചറിയൽ രേഖകളും മൊബൈൽ ഫോണും പരിശോധിച്ചതിൽ നിന്നാണ്​ കൊല്ലപ്പെട്ടയാളെ തിരിച്ചറിഞ്ഞത്. പ്രതിയെ കണ്ടെത്താൻ സമീപത്തെ സിസിടിവി ദൃശ്യങ്ങൾ പരിശോധിച്ചുവരികയാണെന്ന്​ പൊലീസ്​ പറഞ്ഞു. മുസ്​തഫ നഗർ സ്വദേശിയായ ഷാരൂഖിനെതിരെ കഴിഞ്ഞവർഷം പോക്സോ കേസ് രജിസ്റ്റർ ചെയ്തിട്ടുണ്ടെന്നും പൊലീസ് പറഞ്ഞു. 17കാരിക്കൊപ്പം ഒളിച്ചോടിയതിനും പീഡിപ്പിച്ചതിനുമായിരുന്നു ഇത്​.

കൊലപാതകത്തിന് പിന്നിൽ പെൺകുട്ടിയുടെ പിതാവോ സഹോദരനോ ആയിരിക്കാമെന്നാണ്​ പൊലീസ്​ നിഗമനം. മൈലർദേവപള്ളിയിലാണ്​ പെൺകുട്ടിയുടെ വീട്ടുകാർ താമസിക്കുന്നത്​. അവിടെ ഷാരൂഖിനെ നയത്തിൽ വിളിച്ചുവരുത്തിയ ശേഷം കൊലപാതകി സ്​കൂട്ടറിൽ കയറി വരികയും കൊല നടത്തുകയുമായിരുന്നു എന്ന്​ പൊലീസ്​ സംശയിക്കുന്നു.