കർഷകർ തെരുവിൽ, മോദി കൊട്ടാരം പണിയുന്നു -കോൺഗ്രസ്, തറക്കല്ലിടലിന്​ പ്രതിപക്ഷമില്ല​

ന്യൂഡൽഹി: രാജ്യത്തി​െൻറ പുതിയ പാർലമെൻറിന്​ തറക്കല്ലിടുന്ന ചടങ്ങിന്​ പ്രതിപക്ഷ പങ്കാളിത്തം ഉണ്ടായില്ല. പ്രതിസന്ധിയുടെ കാലത്ത്​ ആർഭാട നിർമാണം നടത്തി ചരിത്രപുരുഷനാകാനുള്ള പ്രധാനമന്ത്രി നരേ​ന്ദ്ര മോദിയുടെ മോഹമാണ്​ തിടുക്കത്തിലുള്ള നിർമാണ നീക്കങ്ങൾക്ക്​ കാരണമെന്ന്​ പ്രതിപക്ഷം കുറ്റപ്പെടുത്തി.

അന്നദാതാക്കളായ കർഷകർ 16 ദിവസമായി തെരുവിൽ ജീവനോപാധി സംരക്ഷിക്കാൻ പോരാട്ടം നടത്തു​​േമ്പാൾ സെൻട്രൽ വിസ്​തയുടെ ​പേരിൽ തനിക്ക്​ കൊട്ടാരം പണിയുകയാണ്​ മോദി ചെയ്യുന്നതെന്ന്​ കോൺഗ്രസ്​ വക്​താവ്​ രൺദീപ്​സിങ്​ സുർജേവാല പറഞ്ഞു. സ്വന്തം ഇഷ്​ടങ്ങൾ നടപ്പാക്കാനുള്ളതല്ല, പൊതുസേവനത്തിനുള്ള മാർഗമാണ്​ അധികാരമെന്ന്​ മോദി തിരിച്ചറിയണം. പാർലമെ​െൻറന്നാൽ കല്ലും സിമൻറുമല്ല, ജനാധിപത്യത്തെയും സഹിഷ്​ണുതയെയും 130 കോടി ജനങ്ങളുടെ അഭിലാഷത്തെയുമാണ്​ അതു​ വിഭാവനം ചെയ്യുന്നത്​.

ആത്​മനിർഭർ പാർലമെൻറിന്​​ അമേരിക്കയുടെ പ്രതിരോധ ആസ്ഥാനമായ പെൻറഗണി​നു സമാനമായ രൂപകൽപനയാണെന്ന്​ കോൺഗ്രസ്​ നേതാവ്​ ജയ്​റാം രമേശ്​ പറഞ്ഞു. പെൻറഗൺ മാതൃകയിലാക്കിയത്​ ആകസ്​മികമാണോ, ബോധപൂർവമ​ണോ എന്ന്​ കോൺഗ്രസിലെ മനീഷ്​ തിവാരി ചോദിച്ചു.

ജനാധിപത്യ മൂല്യങ്ങളെക്കുറിച്ചും സംസ്​കാരത്തെക്കുറിച്ചും ധാർമിക പ്രഭാഷണം നടത്തിയ ​മോദി, രാജ്യത്ത്​ ജനാധിപത്യം നിഷ്​കരുണം തകർക്കുകയും വിമതശബ്​ദങ്ങളെ അടിച്ചമർത്തുകയുമാണെന്ന്​ സി.പി.എം ജനറൽ സെക്രട്ടറി സീതാറാം യെച്ചൂരി കുറ്റപ്പെടുത്തി. സുപ്രീംകോടതി വിമർശനം വിലയ്​ക്ക്​ എടുക്കാതെ സർക്കാർ മുന്നോട്ടു പോയതിനെ പ്രമുഖ അഭിഭാഷകൻ പ്രശാന്ത്​ ഭൂഷൺ ചോദ്യം ചെയ്​തു. ഒന്നുകിൽ സുപ്രീംകോടതിയുടെ വരാനിരിക്കുന്ന തീരുമാനത്തെക്കുറിച്ച്​ സർക്കാറിന്​ നല്ല വിശ്വാസമുണ്ട്​, അതല്ലെങ്കിൽ തികഞ്ഞ നിരുത്തരവാദിത്തമാണ്​ സർക്കാർ കാട്ടുന്നതെന്ന്​ അദ്ദേഹം പറഞ്ഞു.