ഫണ്ടിനായി സൈനികരുടെ ശമ്പളവും കവർന്നു; പി.എം കെയേഴ്​സിലേക്ക്​ സേനകളെ കൊള്ളയടിച്ച്​ നേടിയത്​ കോടികൾ

രാജ്യത്തെ മൂന്ന്​ സേനാവിഭാഗങ്ങളിൽ നിന്ന്​ കോടികൾ പി.എം കെയേഴ്​സിലേക്ക്​ ഇൗടാക്കിയതായി വിവരാവകാശ രേഖ. പൊതുമേഖലാ സ്ഥാപനങ്ങൾ, അക്കാദമിക് സ്ഥാപനങ്ങൾ, പൊതുമേഖലാ ബാങ്കുകൾ എന്നിവ മാത്രമല്ല മൂന്ന് സായുധ സേനകളും പ്രധാനമന്ത്രിയുടെ പ്രത്യേക നിധിയിലേക്ക്​ സംഭാവന നൽകിയതായാണ്​ പുറത്തുവന്നിരിക്കുന്ന വിവരം. ഇന്ത്യൻ ആർമി, എയർഫോഴ്​സ്​, നേവി എന്നിവർ ചേർന്ന്​ ജീവനക്കാരുടെ ഒരു ദിവസത്തെ ശമ്പളത്തിൽ നിന്ന് 203.67 കോടി സംഭാവന ചെയ്​തിട്ടുണ്ട്​.

നേരത്തെ ലഭിച്ച വിവരാവകാശ രേഖകൾ പ്രകാരം ഏഴ് പൊതുമേഖലാ ബാങ്കുകളിൽ നിന്നും റിസർവ് ബാങ്ക് ഉൾപ്പെടെയുള്ള മറ്റ് ധനകാര്യ സ്ഥാപനങ്ങളിൽ നിന്നും 204.75 കോടിയുടെ സംഭാവന പി.എം കെയേഴ്​സിന്​ ലഭിച്ചിരുന്നു. ജീവനക്കാരുടെ ശമ്പളത്തിൽ നിന്ന് നിരവധി കേന്ദ്ര വിദ്യാഭ്യാസ സ്ഥാപനങ്ങൾ 21.81 കോടിയും നൽകിയിട്ടുണ്ട്​. ഏപ്രിൽ മുതൽ ഒക്ടോബർ വരെ മൊത്തം 29.18 കോടിയാണ് പി‌എം കെയേഴ്​സിലേക്ക് നൽകിയതെന്ന് വ്യോമസേന വൃത്തങ്ങൾ അറിയിച്ചു. പ്രതിമാസ സംഭാവനയുടെ രൂപത്തിലാണ്​ പണം നൽകിയിരിക്കുന്നത്​.

ഏപ്രിലിൽ 25.03 കോടി, മെയിൽ 75.24 ലക്ഷം, ജൂണിൽ 1.08 കോടി , ജൂലൈയിൽ 73.93 ലക്ഷം, ഓഗസ്റ്റിൽ 61.18 ലക്ഷം, സെപ്റ്റംബറിൽ 50.27 ലക്ഷം, ഒക്ടോബറിൽ 46.70 ലക്ഷം എന്നിങ്ങനെയാണ്​ വ്യോമസേന നൽകിയത്​. നാവികസേന ഡിസംബർ ഒമ്പതിന്​ നൽകിയ പ്രതികരണത്തിൽ ഏപ്രിൽ മുതൽ ഒക്ടോബർ വരെ 12.41 കോടി പി‌എം കെയേഴ്​സിലേക്ക് നൽകിയിട്ടുണ്ട്​. ഇന്ത്യൻ ആർമിയുടെ എ‌ഡി‌ജി പി‌ഐ (അഡീഷണൽ ഡയറക്ടറേറ്റ് ജനറൽ ഓഫ് പബ്ലിക് ഇൻഫർമേഷൻ) ട്വീറ്റ് ചെയ്​ത്​പ്രകാരം ആർമി ഉദ്യോഗസ്ഥർ 2020 ഏപ്രിലിൽ 157.71 കോടി രൂപ സ്വമേധയാ സംഭാവന ചെയ്തിട്ടുണ്ട്.

പ്രതിരോധ മന്ത്രാലയത്തിലെ ജീവനക്കാർ പ്രധാനമന്ത്രിക്ക്​ ഒരു ദിവസത്തെ ശമ്പളം സംഭാവന ചെയ്യുന്നതിനുള്ള നിർദ്ദേശത്തിന് പ്രതിരോധ മന്ത്രി രാജ്‌നാഥ് സിങ്​ അംഗീകാരം നൽകിയതായി മാർച്ച് 29 ന് പ്രസ് ഇൻഫർമേഷൻ ബ്യൂറോ പുറത്തിറക്കിയ പ്രതിരോധ മന്ത്രാലയത്തി​െൻറ പത്രക്കുറിപ്പ്​ പറഞ്ഞിരുന്നു. കോവിഡിനെ നേരിടാൻ പി.എം കെയേഴ്​സ് ഫണ്ട് കരസേന, നാവികസേന, വ്യോമസേന, പ്രതിരോധ പൊതുമേഖലാ സ്ഥാപനങ്ങൾ തുടങ്ങി വിവിധ വിഭാഗങ്ങളിൽ നിന്ന് ഏകദേശം 500 കോടി രൂപ സമാഹരിക്കുമെന്നും ജീവനക്കാരുടെ സംഭാവന സ്വമേധയാ ഉള്ളതാണെന്നും വാർത്താ കുറിപ്പിൽ പറഞ്ഞിരുന്നു. നിലവിൽ രാജ്യത്ത്​ നിലനിലക്കുന്ന യാതൊരുവിധ ഒാഡിറ്റിങ്​ സംവിധാനവും ബാധകമാകാത്ത പി.എം കെയേഴ്​സ്​ ഭരണഘടനാ വിരുദ്ധമാണെന്ന്​ പ്രതിപക്ഷം ആരോപിച്ചിരുന്നു.