ലക്ഷം തൊഴിലാളികൾ സൗദി വിട്ടപ്പോൾ ഇന്ത്യക്കാരുടെ എണ്ണം കൂടി 

ജിദ്ദ: കഴിഞ്ഞവർഷത്തി​​​െൻറ മൂന്നാം പാദത്തിൽ സൗദി അറേബ്യ വിട്ടത്​ ലക്ഷത്തോളം ​വിദേശ തൊഴിലാളികൾ. ജനറൽ അതോറിറ്റി ഫോർ സ്​റ്റാറ്റിസ്​റ്റിക്​സി​​​െൻറ ഒടുവിലെ കണക്ക്​ പ്രകാരം 2017 ​​​െൻറ രണ്ടാം ത്രൈമാസത്തിൽ രാജ്യത്ത്​ ഉണ്ടായിരുന്നത്​ 10.79 ദശലക്ഷം വിദേശികളായിരുന്നു. എന്നാൽ ജൂലൈ^സെപ്​റ്റംബർ കാലയളവിൽ അത്​ 10.6 ആയി ഇടിഞ്ഞു. കുറഞ്ഞത്​ 94,390. അതേസമയം ഇതേകാലയളവിൽ സൗദിയിലുള്ള ഇന്ത്യക്കാരുടെ എണ്ണത്തിൽ വർധനവുണ്ടായി എന്നതാണ്​ കൗതുകകരമായ വസ്​തുത. 2017 മാർച്ചിലെ കണക്കുകൾ പ്രകാരം 30,39,193 ഇന്ത്യക്കാരാണ്​ ഇവിടെ ഉണ്ടായിരുന്നത്​. ആറുമാസം കഴിഞ്ഞ്​ സെപ്​റ്റംബർ ആയപ്പോൾ അത്​ 32,53,901 ആയി. അധികം വന്നത്​ 2,14,708 പേർ. അഥവാ ഏഴുശതമാനം വർധനവ്​. മറ്റുരാജ്യങ്ങളിൽ നിന്നുള്ള പ്രവാസികൾ കുറയു​േമ്പാഴും ഇന്ത്യക്കാരുടെ എണ്ണം വലിയ നിരക്കിൽ സൗദിയിൽ കൂടുകയായിരുന്നു എന്ന്​ അർഥം. പക്ഷേ, പ്രവാസികളെ ബാധിക്കുന്ന നിരവധി സംഭവങ്ങൾ ഉണ്ടായ വർഷാന്ത്യത്തി​നും പുതുവർഷപ്പിറവിക്കും ശേഷമുള്ള കണക്കുകൾ വരാനിരിക്കുന്നതേയുള്ളു. പ്രവാസ​ത്തി​​​െൻറ ദിശ നിർണയിക്കുന്നതായിരിക്കും ആ കണക്കുകൾ എന്ന്​ ഉറപ്പ്​. 

ഇൗ കണക്കുകൾ സൂചിപ്പിക്കുന്ന മാർച്ച്​ മുതൽ സെപ്​റ്റംബർ വരെയുള്ള കാലം അനധികൃതമായി രാജ്യത്ത്​ തങ്ങുകയായിരുന്ന വിദേശികൾക്ക്​ ശിക്ഷകളൊന്നും കൂടാതെ നാടുവിടാനുള്ള ഇളവുകാലമായിരുന്നു. മാർച്ച്​ ഒടുവിൽ ആരംഭിച്ച പൊതുമാപ്പിൽ എട്ടുലക്ഷത്തോളം പേർ രാജ്യം വിട്ടതായാണ്​ കണക്ക്​. ഇതിൽ മുക്കാൽ ലക്ഷത്തിന്​ അടുത്ത്​ ഇന്ത്യക്കാരുണ്ടായിരുന്നു. 90 ദിവസത്തേക്ക്​ ​ആദ്യം പ്രഖ്യാപിച്ച പൊതുമാപ്പ്​ കാലയളവ്​ പലതവണ നീട്ടിനൽകി. പൊതുമാപ്പ്​ പരിധി കഴിഞ്ഞാൽ കർശന പരിശോധന തുടങ്ങു​െമന്നും അറിയിച്ചിരുന്നു. ഒടുവിൽ നവംബർ 15 മുതൽ രാജ്യവ്യാപക പരിശോധന തുടങ്ങി. ഒന്നരമാസം പിന്നിട്ട പരിശോധന കാലത്ത്​ ഏതാണ്ട്​ മൂന്നുലക്ഷം നിയമലംഘകർ പിടിയിലായിട്ടുണ്ട്​. ഇതിൽ ഇന്ത്യക്കാരുടെ എണ്ണം കുറവാണെന്നാണ്​ സൂചനകൾ. ഒൗദ്യോഗികമായ കണക്കുകൾ ഇതുവരെ പുറത്തുവിട്ടിട്ടില്ല. ഇതിനൊപ്പമാണ്​ നൂറുകണക്കിന്​ മലയാളികൾ ഉൾപ്പെടെ ധാരാളം ഇന്ത്യക്കാർ ജോലി ചെയ്​തിരുന്ന ജ്വല്ലറി രംഗം സ്വദേശിവത്​കരിച്ചത്​. കേരളത്തിൽ നിന്നുള്ള അ​​ഞ്ചോളം ജ്വല്ലറി ബ്രാൻഡുകൾക്ക്​ സൗദിയിൽ ഷോറൂമുകൾ ഉണ്ട്​. ഏതാണ്ട്​ എല്ലാവൻ നഗരങ്ങളിലും അവരുടെ സാന്നിധ്യവും ഉണ്ടായിരുന്നു. നവംബർ^ഡിസംബർ മാസങ്ങളിൽ അതിദ്രുതം നടപ്പാക്കിയ ജ്വല്ലറി സ്വദേശിവത്​കരണം ഏതാണ്ട്​ സമ്പൂർണമായി കഴിഞ്ഞു. ഇവിടങ്ങളിൽ ജോലി ചെയ്​തിരുന്ന മലയാളികൾ പലരും മടങ്ങിയിട്ടുണ്ട്​. ഇതിന്​ പിന്നാലെയാണ്​ സ്വകാര്യമേഖലയിൽ പണിയെടുക്കുന്ന വിദേശികൾക്കുള്ള ലെവി ഇരട്ടിയാക്കിയത്​. നിലവിൽ പ്രതിമാസം 200 റിയാലുണ്ടായിരുന്ന ലെവി ജനുവരി ഒന്നുമുതൽ 400 റിയാൽ ആയി. അടുത്തവർഷം അത്​ 600 ഉം, 2020 ൽ 800 ഉം ആയി വർധിക്കും. സ്വദേശിവത്​കരണത്തിന്​ ആക്കം കൂട്ടാനാണ്​ തൊഴിൽമന്ത്രാലയം വിദേശി തൊഴിലാളികളുടെ ലെവി വർധിപ്പിക്കുന്നത്​. ഇതും പ്രവാസികളെ ബാധിക്കും.

ആശ്രിത വിസയിലുള്ളവർക്ക്​ ഏർപ്പെടുത്തിയ ലെവിയും ഇൗ വർഷം ഇരട്ടിയാകും. 2017 ജൂലൈ മുതലാണ്​ ഇത്​ നടപ്പാക്കിയത്​. ഒരു ആശ്രിതന്​ പ്രതിമാസം 100 റിയാൽ ആണ്​ ലെവി. 2018 ജൂലൈയിൽ അത്​ 200 ആകും. അടുത്തവർഷം 300 ഉം. കുടുംബവുമായി കഴിയുന്ന പ്രവാസികളുടെ ബജറ്റിനെ ഇത്​ വലിയ തോതിൽ സ്വാധീനിക്കും. ജനുവരി ഒന്നിന്​ പ്രാബല്യത്തിൽ വന്ന എണ്ണ വില വർധനയാണ്​ മറ്റൊരുഘടകം. ഒക്​ടീൻ 91 പെട്രോളിന്​ 1.37 റിയാലാണ്​ പുതുക്കിയ നിരക്ക്​. 75 ഹലാലയായിരുന്നു നിലവിൽ. 90 ഹലാല ഉണ്ടായിരുന്ന ഒക്ടീന്‍ 95 ന് 2.04 റിയാലായി. ആദ്യ ഇനത്തിന്​ 83 ശതമാനവും രണ്ടാമത്തേതിന്​ 127 ശതമാനവുമാണ്​ വർധിച്ചത്​. ഇന്ധനത്തിനുള്ള സബ്സിഡി എടുത്തു കളഞ്ഞതാണ്​ വില വര്‍ധനക്ക്​ ഇടയാക്കിയത്​. പകരം സബ്സിഡി അര്‍ഹിക്കുന്ന പൗരന്മാര്‍ക്ക് സിറ്റിസൺ അക്കൗണ്ട് വഴി ധനസഹായം വിതരണം ചെയ്യും.  അതുകൊണ്ട്​ തന്നെ 2018 സൗദി പ്രവാസത്തെ സംബന്ധിച്ചിടത്തോളം നിർണായകമാണ്​. പ്രവാസത്തി​​​െൻറ ദിശ​ എങ്ങോട്ടാണെന്ന്​ കൃത്യമായി തിരിച്ചറിയാൻ അവസരമൊരുക്കുന്ന വർഷം.