ഒടുവിൽ മരണത്തിന്​ കീഴടങ്ങി അമീർ ആലം

റിയാദ്​: ജന്മനാട്ടിൽ പ്രിയപ്പെട്ടവരുടെ അടുത്തെത്താനും രോഗശാന്തിക്ക്​ വിദഗ്​ധ ചികിത്സ തേടാനും കഴിയാതെ അമീർ ആലം ഒടുവിൽ കണ്ണടച്ചു. ബ്രെയിൻ ട്യൂമർ ബാധിച്ച്​ രണ്ട്​ മാസമായി ഗുരുതരാവസ്ഥയിലായിരുന്നിട്ടും തൊഴിലുടമയുടെ നിസ്സഹകരണം മൂലമാണ്​ നാട്ടിലേക്കുള്ള വഴിയടഞ്ഞത്​. മലയാളി സാമൂഹിക പ്രവർത്തകർ നാട്ടിലയക്കാൻ ശ്രമം നടത്തിയെങ്കിലും ഫലം കണ്ടില്ല. അതിനിടയിലാണ്​ അന്ത്യം സംഭവിച്ചത്​​. റിയാദ്​ ദല്ല ആശുപത്രിയിൽ ശനിയാഴ്​ച രാത്രിയാണ്​ മരിച്ചത്​. ഗോപാൽ ഗഞ്ച്​ താവേ ബേദു തോല ഗ്രാമവാസിയാണ്​ ഇൗ 61 കാരൻ. 33 വർഷമായി റിയാദിലെ കൺസ്​ട്രക്ഷൻ കമ്പനിയിൽ മേശനായിരുന്നു. നല്ലനിലയിൽ പ്രവർത്തിച്ചിരുന്ന കമ്പനി നാലുവർഷം മുമ്പ്​ ഉടമയുടെ മരണത്തെ തുടർന്ന്​ അനാഥാവസ്ഥയിലായി. മക്കൾ ഭരണം ഏറ്റെടുത്തെങ്കിലും ഒരു വർഷം മുമ്പ്​ പ്രവർത്തനം താളം തെറ്റി. ജീവനക്കാരുടെ ശംബളം മുടങ്ങി.

ഇതിനിടയിലാണ്​ അമീർ ആലമിന്​ രോഗം പിടിപെട്ടത്​. ഒരു വർഷം മുമ്പ്​​ ​േരാഗബാധയുണ്ടായതെങ്കിലും രണ്ട്​ മാസം മുമ്പാണ്​ ആശുപത്രിയിൽ പ്രവേശിപ്പിച്ച്​ രോഗം ബ്രെയിൻ ട്യൂമറാണെന്ന്​ തിരിച്ചറിഞ്ഞത്​. ശുമൈസി ആശുപത്രിയിൽ 15 ദിവസം ചികിത്സിച്ചു. ആരോഗ്യനിലയിൽ പുരോഗതി ദൃശ്യമായതിനെ തുടർന്ന്​ ആശുപത്രിയിൽ നിന്ന്​ വിട്ടയച്ചു. തുടർന്ന്​ കമ്പനി വക താമസസ്ഥലത്ത്​ കഴിയുകയായിരുന്നു. ഇതിനിടെ നാട്ടിൽ കൊണ്ടുപോകാൻ പ്രവാസി മലയാളി ഫെഡറേഷൻ ഗ്ലോബൽ പ്രസിഡൻറ്​ റാഫി പാങ്ങോടി​​​െൻറ നേതൃത്വത്തിൽ ശ്രമം തുടങ്ങി. എന്നാൽ ഇഖാമയുടെ കാലാവധി കഴിഞ്ഞത്​ ഉൾപ്പെടെ പല നിയമ തടസ്സങ്ങളുമുണ്ടായി. കമ്പനിയധികൃതരുടെ നിസ്സഹകരണം മൂലം ഇൗ കുരുക്കുകൾ അഴിക്കാനും കഴിഞ്ഞില്ല. അതിനിടെ 14 ദിവസം മുമ്പ്​ രോഗം വീണ്ടും മൂർഛിച്ചു. ദല്ല ആശുപത്രിയിൽ പ്രവേശിപ്പിച്ച്​ അവിടെ ചികിത്സ നടത്തുന്നതിനിടെയാണ്​ മരണം സംഭവിച്ചത്​.

മൃതദേഹം ദല്ല ആശുപത്രി മോർച്ചറിയിൽ സൂക്ഷിച്ചിരിക്കുകയാണ്​. ഭാര്യ സുലേഖ ഖാത്തൂം മൃതദേഹം നാട്ടിലെത്തിക്കണമെന്ന്​ ആവശ്യപ്പെട്ടിരിക്കുകയാണ്​. നാട്ടിൽ കൊണ്ടുപോകാനുള്ള ശ്രമം മലയാളി സാമൂഹിക പ്രവർത്തകരുടെ ഭാഗത്തുനിന്നുണ്ടായിട്ടുണ്ട്​. കോട്ടയം ജില്ല പ്രവാസി അസോസിയേഷൻ പ്രസിഡൻറ് ലൈജു, വിജയകുമാർ, രതീഷ് കുമാർ തുടങ്ങിയവരും സഹായവുമായി രംഗത്തുണ്ട്​. അമീർ ആലമിന്​ മൂന്നു മക്കളാണ്​. രണ്ട്​ ആൺമക്കളുടെ വിവാഹം കഴിഞ്ഞു. ഒരു മകളുമുണ്ട്​.