'സ്​പീക്കപ്​ ഖത്തർ' കലാശപ്പോരിന്​ ആറുനാൾ ഒരുക്കം തകൃതി; ഫൈനൽ വെള്ളിയാഴ്​ച

ദോഹ: 'ഗൾഫ്​ മാധ്യമം' സംഘടിപ്പിക്കുന്ന 'സ്​പീക്കപ് ഖത്തർ' പ്രസംഗ മത്സരത്തിൻെറ കലാശപ്പോരാട്ടത്തിലേക്ക്​ ഇനി ആറു നാളുകൾ മാത്രം. ജൂ​ൈല​ 23 വെള്ളിയാഴ്​ചയാണ്​ ഖത്തറിലെ വിവിധ ഇന്ത്യൻ സ്​കൂളുകളിലെ വിദ്യാർഥി പ്രതിഭകൾ മാറ്റുരക്കുന്ന ചാമ്പ്യൻഷിപ്പിൻെറ ഫൈനൽ പോരാട്ടം.

500ൽ ഏറെ വിദ്യാർഥികളിൽ തുടങ്ങി അവസാന റൗണ്ടിലെത്തിയ മത്സരത്തിൽ അവശേഷിക്കുന്നത്​ വെറും 24 പേരാണ്​. സീനിയർ, ജൂനിയർ എന്നിവയിലായി ഇംഗ്ലീഷ്​-മലയാളം വിഭാഗങ്ങളിലായി ഫൈനലിനൊരുങ്ങുന്നവർ അവസാനവട്ട തയാറെടുപ്പിലാണിപ്പോൾ. മലയാളത്തിലെ അക്കാദമിക്​, സാഹിത്യ, സാംസ്​കാരിക, മാധ്യമ മേഖലകളിലെ പ്രമുഖർ വിധികർത്താക്കളായെത്തുന്ന ഫൈനലിന്​ മത്സരാർഥികൾ ഒരുക്കത്തിലും ഒട്ടും മോശമല്ല. കൂടുതൽ ഗൗരവത്തോടെയും മത്സരബുദ്ധിയോടെയും ഫൈനലിനായി ഒരുങ്ങുന്നതിനായി 'ഗൾഫ്​ മാധ്യമം' നേതൃത്വത്തിൽ കഴിഞ്ഞ ദിവസം വർക്​ഷോപ്​ നടന്നു.

വിദഗ്​ധരുടെ മേൽനോട്ടത്തിൽ നടന്ന പരിശീലന ക്യാമ്പിൽ ഫൈനൽ റൗണ്ടിൽ മാറ്റുരക്കുന്ന വിദ്യാർഥികൾ ആവേശത്തോടെയാണ്​ പ​ങ്കെടുത്തത്​. എങ്ങനെ നല്ല പ്രസംഗകനാവാം, വിഷയങ്ങളെ തിര​ഞ്ഞെടുക്കുന്നതിലും പഠിക്കുന്നതിലും വേണ്ട ജാഗ്രത, പ്രസംഗകൻെറ ശരീരഭാഷ, ​ആൾക്കൂട്ടത്തെ അഭിസംബോധന ചെയ്യുന്നതിലെ ഭയം തുടങ്ങിയ ഭാഗങ്ങൾ ഉൾപ്പെടുത്തിയായിരുന്നു പരിശീലനം.വിവിധ സെഷനുകളിലായി നടന്ന ക്യാമ്പിന്​ ജെ.സി.ഐ നാഷനൽ ​ട്രെയ്​നർ വിബിൻ കുമാർ (എജ്യൂവേർ) നേതൃത്വം നൽകി.

മുതിർന്ന ഐ.എസ്​.എ ഉദ്യോഗസ്​ഥനും പൊതുവിദ്യാഭ്യാസവകുപ്പ്​ പ്രിൻസിപ്പൽ സെക്രട്ടറിയുമായ എ.പി.എം. മുഹമ്മദ്​ ഹനീഷ്​ ഐ.എ.എസ്​, മുൻ പാർലമെൻറ്​ അംഗവും മുതിർന്ന അഭിഭാഷകനുമായ ഡോ. സെബാസ്​റ്റ്യൻ പോൾ, എഴുത്തുകാരനും സാംസ്​കാരിക പ്രവർത്തകനുമായ കെ.ഇ.എൻ. കുഞ്ഞഹമ്മദ്​, 'മാധ്യമം' അസോസിയേറ്റ്​ എഡിറ്ററും മീഡിയവൺ എം.ഡിയുമായ ഡോ. യാസീൻ അഷ്​റഫ്​, മീഡിയവൺ ചാനൽ അസി. എക്​സിക്യൂട്ടിവ്​ എഡിറ്റർ അഭിലാഷ്​ മോഹനൻ എന്നിവരാണ്​ ഫൈനൽ മത്സരത്തിൻെറ വിധികർത്താക്കൾ.

500ഒാളം പേരുടെ എൻട്രിയിൽനിന്ന്​ തിരഞ്ഞെടുത്ത 60 പേർ മത്സരിച്ച പ്രാഥമിക റൗണ്ടിൽനിന്ന്​ വിജയികളാണ്​ 24 പേരാണ്​ ഫൈനൽ റൗണ്ടിൽ മാറ്റുരക്കുന്നത്​. ഓരോ വിഭാഗത്തിലേക്കും ആറു പേരെയാണ്​ പരിഗണിച്ചത്​.