'സമ്പൂർണ ലോക്​ഡൗൺ ഒഴിവാക്കിയത്​ സാ​ങ്കേതിക സംവിധാനങ്ങളുടെ മികവിൽ'

ദോഹ: കോവിഡ്​ മഹാമാരിയുടെ ഭീതിക്കിടയിൽ ലോകരാജ്യങ്ങളിൽ ഏറെയും സമ്പൂർണ ലോക്​ഡൗണിലേക്ക്​ നീങ്ങിയപ്പോൾ ഖത്തർ ഈ വെല്ലുവിളി മറികടന്നത്​ സാ​ങ്കേതിക സംവിധാനങ്ങളുടെ കൂടി മികവിലെന്ന്​ പൊതുജനാരോഗ്യ വിഭാഗം ഡയറക്​ടർ ഡോ. മുഹമ്മദ്​ ബിൻ ഹമദ്​ ആൽഥാനി. കഴിഞ്ഞ ദിവസം സമാപിച്ച ഖത്തർ സാമ്പത്തിക ഫോറത്തിൻെറ ഭാഗമായി നടന്ന 'ആരോഗ്യ അടിയന്തര സാഹചര്യങ്ങളിൽ ഇൻറർനെറ്റ്'​ എന്ന വിഷയത്തിലെ ചർ​ച്ചയിൽ പ​ങ്കെടുത്ത്​ സംസാരിക്കവെയാണ്​ കോവിഡ്​ വെല്ലുവിളിയെ നൂതന സാ​ങ്കേതിക വിദ്യകളുടെ മികവോടെ ഖത്തർ മറികടന്നതിനെ കുറിച്ച്​ അദ്ദേഹം വിശദീകരിച്ചത്​.

'രാജ്യത്തെ പൊതുജനാരോഗ്യ മേഖലയെ മുഴുവൻ ഒരു കേന്ദ്രീകൃത സംവിധാനത്തിലൂടെ ​കണ്ണിചേർത്താണ്​ കോവിഡിനെതിരായ പോരാട്ടം ആരംഭിച്ചത്​. മുഴുവൻ ആരോഗ്യ സംവിധാനങ്ങളും ഈ ശ​ൃ​​​ംഖലയുടെ ഭാഗമായി ഒറ്റ യൂനിറ്റായി പ്രവർത്തിച്ചു. ഇഹ്​തിറാസ്​ ഉൾപ്പെടെയുള്ള അത്യാധുനിക നിരീക്ഷണസംവിധാനങ്ങളിൽ കാര്യമായ നിക്ഷേപം നടത്തി. കുറ്റമറ്റരീതിയിലെ ഇത്തരം പരിഷ്​കാരങ്ങൾ കാരണം സമ്പൂർണ ലോക്​ഡൗൺ ഒഴിവാക്കാൻ രാജ്യത്തിന്​ കഴിഞ്ഞു. മറ്റ്​ ലോക​രാ​ജ്യങ്ങൾ മാസങ്ങൾ നീണ്ട ലോക്​ഡൗണിൽ കഴിഞ്ഞ കാലമായിരുന്നു ഖത്തർ ഈ വെല്ലുവിളിയെ മനോഹരമായി അതിജീവിച്ചത്​' -​ഡോ. മുഹമ്മദ്​ ബിൻ ഹമദ്​ ആൽഥാനി വ്യക്​തമാക്കി.

ഇൻറർനെറ്റ്​ അധിഷ്​ഠിത നൂതന സാ​ങ്കേതികവിദ്യയിലെ നിക്ഷേപങ്ങൾ ആരോഗ്യമേഖലക്കും സാമ്പത്തികമേഖലക്കും ആത്​മവിശ്വാസം പകരുന്നതായിരുന്നു. മഹാമാരിയെ നേരിടുന്നതിൽ തുടക്കംമുതലേ കൃത്യമായ ധാരണയും ദിശാബോധവും രാജ്യത്തിനുണ്ടായിരുന്നു. അധികംവൈകാതെ ഖത്തറിലും രോഗം റിപ്പോർട്ട്​ ​െചയ്യുമെന്ന്​ മുൻകൂട്ടി അറിഞ്ഞുകൊണ്ടുതന്നെയാണ്​ തയാറെടുത്തത്​. ഇൻറർനെറ്റ്​ അധിഷ്ഠിത മേഖലയിലെ നിക്ഷേപം വലിയതായി തോന്ന​ിയെങ്കിലും പിന്നീട്​ അതിൻെറ ഗുണഫലങ്ങൾ രാജ്യവും ജനങ്ങളും അനുഭവിച്ചുതുടങ്ങി -ഡോ. മുഹമ്മദ്​ ബിൻ ഹമദ്​ ആൽഥാനി പറഞ്ഞു.

കഴിഞ്ഞ 10-12 മാസത്തിനിടെ പരിശോധന ഉൾപ്പെടെയുള്ള മേഖലയിൽ മാറ്റമുണ്ടായതായി ജി.ഇ ഹെൽത്ത്​കെയർ തലവൻ ഡോ. മത്യാസ്​ ഗോയൻ പറഞ്ഞു. മൊബൈൽ, വെർച്വൽ ആരോഗ്യമേഖലയിൽ ആളുകളുടെ സമീപനം മാറി. നേരിട്ട്​ ആശുപ​ത്രിയിലെത്തിയും ഡോക്​ടറെ കണ്ടും ചികിത്സതേടുന്നതിന്​ പകരം ഓൺലൈൻവഴി ടെലിമെഡിസിൻ സംവിധാനം പ്രചാരം നേടി. ഈ പ്രവണതകൾ വരുംകാലത്ത്​ ആരോഗ്യരംഗത്ത്​ കാര്യമായ മാറ്റങ്ങൾക്ക്​ വഴിവെക്കുമെന്നും അദ്ദേഹം പറഞ്ഞു.