അമീർ ശൈഖ് മിശ്അൽ അൽ അഹ് മദ് അൽ ജാബിർ അസ്സബാഹും യു.എ.ഇ വൈസ് പ്രസിഡന്റും ഉപപ്രധാനമന്ത്രിയും പ്രസിഡൻഷ്യൽ കോടതി മന്ത്രിയുമായ ശൈഖ് മൻസൂർ
ബിൻ സായിദ് ആൽ നഹ് യാനും കൂടിക്കാഴ്ചയിൽ
കുവൈത്ത് സിറ്റി: ഉഭയകക്ഷി ബന്ധങ്ങൾ ശക്തിപ്പെടുത്തി കുവൈത്തും യു.എ.ഇയും. ഇരുരാജ്യങ്ങളും തമ്മിൽ വിവിധ കരാറുകളിലും ധാരണപത്രങ്ങളിലും ഒപ്പുവച്ചു. യു.എ.ഇ വൈസ് പ്രസിഡന്റും ഉപപ്രധാനമന്ത്രിയും പ്രസിഡൻഷ്യൽ കോടതി മന്ത്രിയുമായ ശൈഖ് മൻസൂർ ബിൻ സായിദ് ആൽ നഹ് യാന്റെയും പ്രതിനിധി സംഘത്തിന്റെയും കുവൈത്ത് സന്ദർശനത്തിനിടെയായിരുന്നു ഒപ്പുവെക്കൽ.
നയതന്ത്ര സഹകരണം, കര ഗതാഗതം, സാമൂഹിക കാര്യങ്ങളും വികസനവും, വ്യവസായവും നൂതന സാങ്കേതികവിദ്യയും, വിദ്യാഭ്യാസ സഹകരണം, എണ്ണ, വാതകം, മനുഷ്യക്കടത്ത് തടയൽ, വൈദ്യുതി, വെള്ളം, നേരിട്ടുള്ള നിക്ഷേപം പ്രോത്സാഹിപ്പിക്കൽ, സംയുക്ത സുരക്ഷാ പദ്ധതികളിൽ ഡേറ്റയുടെയും വിവരങ്ങളുടെയും സംരക്ഷണം എന്നിവയുമായി ബന്ധപ്പെട്ട ധാരണപത്രങ്ങളിൽ ഇരു രാജ്യങ്ങളും ഒപ്പുവച്ചു.
പ്രധാനമന്ത്രി ശൈഖ് അഹ്മദ് അബ്ദുല്ല അൽ അഹമ്മദ് അസ്സബാഹ് യു.എ.ഇ വൈസ് പ്രസിഡന്റും ഉപപ്രധാനമന്ത്രിയും പ്രസിഡൻഷ്യൽ കോടതി മന്ത്രിയുമായ ശൈഖ് മൻസൂർ ബിൻ സായിദ് ആൽ നഹ് യാൻ എന്നിവരുടെ മേൽനോട്ടത്തിലായിരുന്നു ഒപ്പുവെക്കൽ.
അമീർ ശൈഖ് മിശ്അൽ അൽ അഹമ്മദ് അൽ ജാബിർ അസ്സബാഹുമായി ശൈഖ് മൻസൂർ ബിൻ സായിദ് ആൽ നഹ് യാൻ ഔദ്യോഗിക കൂടിക്കാഴ്ചയും നടത്തി. കിരീടാവകാശി ശൈഖ് സബാഹ് ഖാലിദ് അൽ ഹമദ് അൽ മുബാറക് അസ്സബാഹ്, പ്രധാനമന്ത്രി ശൈഖ് അഹ് മദ് അബ്ദുല്ല അൽ അഹ് മദ് അസ്സബാഹ്, ഒന്നാം ഉപപ്രധാനമന്ത്രിയും ആഭ്യന്തര മന്ത്രിയുമായ ശൈഖ് ഫഹദ് യൂസഫ് സഊദ് അസ്സബ്, വിദേശകാര്യ മന്ത്രി അബ്ദുല്ല അൽ യഹ് യ എന്നിവരും മുതിർന്ന ഉദ്യോഗസ്ഥരും പങ്കെടുത്തു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.