ആപ്പിളിനെ തളർത്താൻ കോവിഡിനുമായില്ല; വിപണി മൂല്യം രണ്ട്​ ട്രില്യൺ ഡോളറിലെത്തുന്ന ആദ്യ അമേരിക്കൻ കമ്പനി

ന്യൂയോർക്ക്​: വിപണി മൂല്യം രണ്ട്​ ട്രില്യൺ ഡോളറിലെത്തുന്ന ആദ്യത്തെ അമേരിക്കൻ കമ്പനിയായി മാറി ആപ്പിൾ. 2020ൽ ആപ്പിളി​െൻറ ഷെയറുകൾക്ക് 60 ശതമാനം വളർച്ച ലഭിച്ചതോടെയാണ് കമ്പനി മികച്ച നേട്ടമുണ്ടാക്കിയത്. ഏറ്റവും ഒടുവിലത്തെ കണക്കുകൾ പ്രകാരം ആപ്പിളി​െൻറ ഓഹരി വില 468.65 ഡോളറാണ്​. അതോടെ വിപണി മൂലധനം രണ്ട്​ ട്രില്യൺ മറികടക്കുകയായിരുന്നു. കമ്പനിക്ക്​ എല്ലാ കാറ്റഗറികളിലും വരുമാന വർധനവുണ്ടായി. കോവിഡ്​ കാലത്തും ലോകമെമ്പാടും ആപ്പിൾ ഉത്​പന്നങ്ങൾക്ക്​ ആവശ്യക്കാർ വർധിച്ചതോടെയാണ്​ കമ്പനി വലിയ നേട്ടത്തിലേക്ക്​ കുതിച്ചത്​.

ആമസോൺ, മൈക്രോസോഫ്റ്റ്​, തുടങ്ങിയ കമ്പനികളാണ് ഒാഹരി മൂല്യത്തിൽ​ ആപ്പിളിന്​ പിന്നിലുള്ളത്​. കോവിഡ്​ പ്രതിസന്ധി സൃഷ്‌ടിച്ച അപ്രതീക്ഷിത തിരിച്ചടിയിൽ നിന്നും എങ്ങനെയെങ്കിലും കരകയറാൻ ചില വമ്പൻ കമ്പനികൾ പെടാപ്പാട്​ പെടുന്നതിനിടെയാണ്​ ആപ്പിളി​െൻറ പുതിയ റെക്കോർഡ്​ എന്നതും​ ശ്രദ്ദേയമാണ്​. ​കമ്പനിയുടെ വിപണി മൂല്യം രണ്ട് വർഷം മുമ്പാണ്​​ ഒരു ട്രില്യൺ ഡോളറിൽ എത്തിയത്​. 

സൗദി അറേബ്യയുടെ ദേശീയ ഒായിൽ കമ്പനിയായ സൗദി അരാംകോയാണ്​​ ഇതിന്​ മുമ്പ്​ (2019 ഡിസംബറിൽ) രണ്ട് ട്രില്യൺ ഡോളറി​െൻറ വിപണി മൂല്യം സ്വന്തമാക്കിയത്​. എണ്ണ വിലയിലുണ്ടയ ഏറ്റക്കുറച്ചിൽ കമ്പനിയെ ബാധിച്ചതിനെ തുടർന്ന്​ ഓഹരികളിൽ ഇടിവുണ്ടായതോടെ നിലവിൽ 1.82 ട്രില്യൺ ഡോളറി​െൻറ വിപണി മൂല്യമാണ് സൗദി അരാംകോക്ക്​ ഉള്ളത്.

കോവിഡ് പ്രതിസന്ധിമൂലം ചൈനയിൽ പ്രവർത്തിച്ചിരുന്ന ഫാക്‌ടറികളും ആപ്പിൾ സ്​റ്റോറുകളും കമ്പനി വ്യാപകമായി അടച്ചു പൂട്ടിയിരുന്നു. പിന്നാലെ റീട്ടെയിൽ വിൽപ്പനയും ചരിത്രത്തിലെ ഏറ്റവും താഴ്‌ന്ന നിലയിലെത്തി. എന്നാൽ, ഇതൊന്നും ആപ്പിളി​െൻറ ഓഹരി വിപണിയെ ബാധിച്ചില്ല. ലോകത്തെ ജനങ്ങൾ ആപ്പിളി​െൻറ ഉത്പന്നങ്ങളിൽ പുലർത്തുന്ന വിശ്വാസമാണ്​ ഇതിനൊക്കെ കാരണമെന്നും കമ്പനി അവകാശപ്പെടുന്നു.

കോവിഡ് പ്രതിസന്ധിയിൽ റീടെയിൽ മാർക്കറ്റിൽ തിരിച്ചടി നേരി​െട്ടങ്കിലും ഐഫോണുകളടക്കമുള്ള കമ്പനിയുടെ മറ്റ് പ്രമുഖ ഉത്‌പന്നങ്ങളെല്ലാം ഓൺലൈനിലൂടെ വലിയ രീതിയിൽ വിറ്റഴിച്ചതായി ആപ്പിൾ പറയുന്നു. ലോക്​ഡൗൺ കർക്കശമാക്കിയ ഏപ്രിൽ മുതൽ ജൂൺ വരെയുള്ള മാസങ്ങളിൽ ഒാൺലൈൻ വിൽപ്പനയിലൂടെ മികച്ച വരുമാനമാണ് നേടിയതെന്നും ആപ്പിൾ ചൂണ്ടിക്കാട്ടുന്നു.