റഷ്യൻ ഹെലികോപ്റ്ററുകൾ തകർത്തു; നദി കടക്കാനുള്ള ശ്രമം തടഞ്ഞുവെന്നും യുക്രെയ്ൻ

കീവ്: റഷ്യയുടെ 11 വ്യോമവാഹനങ്ങൾ തകർക്കാനും റഷ്യൻ സേന യുക്രെയ്ൻ നദി കടക്കുന്നത് തടയാനും സാധി​ച്ചെന്ന് യുക്രെയ്ൻ വ്യോമസേന അവകാശപ്പെട്ടു. ഇത് രണ്ടാം തവണയാണ് യുക്രെയ്ൻ നദി കടക്കാനുള്ള റഷ്യൻ സംഘത്തിന്റെ ശ്രമം പരാജയപ്പെടുന്നത്.

മെയ് 15 ന് 11 റഷ്യൻ ലക്ഷ്യങ്ങൾ തകർക്കാൻ സാധിച്ചുവെന്ന് വ്യോമ സേനയെ ഉദ്ധരിച്ചുകൊണ്ട് ദ കീവ് ഇൻഡിപെൻഡന്റ് അറിയിച്ചു. രണ്ട് ക്രൂയിസ് മിസൈൽ, മൂന്ന് ഒർലാൻ -10യുഎവിഎസ്, ഒരു കെഎ-52 ഹെലികോപ്റ്റർ എന്നിവ ആന്റി ക്രാഫ്റ്റ് മിസൈൽ ഉപയോഗിച്ച് തകർത്തു. വ്യോമ പ്രതിരോധ സംഘം എംഐ-28 ഹെലികോപ്റ്ററും നാല് ഒർലാൻ -10യുഎവിഎസും തകർത്തു.

ഇൻഹുലെറ്റ് നദി കടക്കാനുള്ള റഷ്യൻ സൈന്യത്തിന്റെ ശ്രമം തടയാനും സാധിച്ചതായി യുക്രെയ്ൻ ​സേന അറിയിച്ചു. നേരത്തെ സി​വെർസ്കൈ ഡോനെറ്റ് നദി കടക്കാനുള്ള റഷ്യൻ ശ്രമവും യുക്രെയ്ൻ സേന തടഞ്ഞിരുന്നു.