പൊരുൾതിരിവ്

മുടിയിഴകളായി

കണ്ണിലുരുമ്മുന്നു

മൂക്കറ്റത്തു പതുങ്ങുന്നു

‘‘പനിക്കുന്നോ’’യെന്ന്

നെറ്റിമേൽ തൊട്ടറിയുന്നു

കവിളുചൊറിഞ്ഞുതരവെ

താടിരോമങ്ങളിൽ കുരുങ്ങുന്നു

ഓർമകൾ

-എന്നു ഞാനവളുടെ മുലക്കൂർപ്പിൽ വിരൽ വിരിച്ചു

തലയിൽ

കാൽചവിട്ടിയുറച്ചുനിന്ന്

കലർന്നൊട്ടിയ വെളുപ്പുകറുപ്പുകളിൽ

മുഖത്തേറെയുള്ളൊരാ

ഉമ്മത്തടങ്ങളെ ലാക്കാക്കി

അരുമയായി ഒഴുകിയിറങ്ങുന്നത്

മറവിയുടെ

വടിവുകളാ-

ണെന്നവളെന്റെ

ചെവിഭൂവിലൊരുനനവുനട്ടു

ഇത്രയുമായപ്പോഴേക്കും

കാടുകയറിച്ചത്തു-

പ്പൊയ്പോയ പൂച്ചകളുടെ

ഉടലുതിന്നു-

വീർത്ത പുഴുക്കൾ

മയങ്ങിവീണ്

താഴേക്കുരുണ്ടുരുണ്ട്

ഉച്ചിയിലൊരു മഴക്കാറുപൊട്ടിയ കണക്കെ

ഇപ്പോൾ

ഞങ്ങൾപ്പാതി

മുങ്ങിക്കഴിഞ്ഞു.