ഞാൻ പകലിനെ പേടിക്കുന്നത് എന്തുകൊണ്ട്‍?

പകലിലെ സൂര്യന്

മഞ്ഞനിറമായതുകൊണ്ട്

മഞ്ഞയെന്നാല്‍ മരണമെന്നോ

വിരഹമെന്നോ പേരിടാമെന്നതുകൊണ്ട്

പുറത്ത് ചെടികള്‍ക്കും മരങ്ങള്‍ക്കുമെല്ലാം

പച്ചനിറമായതുകൊണ്ട്

ആ പച്ചനിറം

നിന്റെ ഉടലില്‍

തട്ടിത്തെറിക്കുമ്പോള്‍

എന്റെ കണ്ണുകള്‍ക്ക്

താങ്ങാനാവില്ല

എന്നതുകൊണ്ട്

ഓരോ നിറത്തിനും

ഓരോ അവകാശികളുണ്ട്

എല്ലാ നിറങ്ങളും ചേരുമ്പോള്‍

കറുപ്പാകും

എന്നതുകൊണ്ട്

നിങ്ങളെല്ലാം

നിറത്തിന് അടിമകളാണ്

എന്നതുകൊണ്ട്

ഞാന്‍ പകലിനെ പേടിക്കുന്നു

ഇത് ദൈവവും

ഞാനും തമ്മിലുള്ള

ഉടമ്പടിയാണ്.