പൂത്താങ്കീരികൾ

‘റൺവേ’യിൽ പൂത്താങ്കീരിക്കൂട്ടങ്ങൾ. ‘കലപില’.

ചെന്നിറ ബൾബിൻ വ്യൂഹം തെളിഞ്ഞൂ വിഹായസ്സിൽ.

വന്നിറങ്ങുക വയ്യ വിമാനങ്ങൾക്കൊന്നുമേ.

നിന്നനിൽപ്പിൽ ഞാൻ പേടിക്കറുപ്പൻ ബലൂണായി.

അങ്ങുനിന്നെനിക്കായി കാവ്യപുസ്തകങ്ങളും

അത്യപൂർവമാം ‘കോന്യാക്ക്’ കുപ്പിയുമേന്തിക്കൊണ്ടു-

നീ വരുന്നതിൻ ‘മെസ്സേജ്’ കിട്ടിയ സന്തോഷത്തെ-

ക്കൊത്തിത്തിന്നുകയാണീ പൂത്താങ്കീരികളെല്ലാം.

ഇപ്പോൾ നീ യെവിടെയാ,ണെൻ ‘മെസ്സേജ്’ വായിക്കുക.

‘ക്യാൻസൽ’ ചെയ്യുക യാത്ര,യെത്രയും വേഗം തോഴീ.

അടുത്ത തവണ നീ വരുമ്പോൾ മതിയെല്ലാം.

അസത്തുപൂത്താങ്കീരിക്കൂട്ടമാണിങ്ങെങ്ങുമേ.