ഫ്ലോറിഡ: ഇന്റർമയാമിയുടെ പ്രീ സീസൺ സൗഹൃദ മത്സരങ്ങളിലെ അവസാന പോരാട്ടം നാളെ ഫ്ലോറിഡയിൽ നടക്കും. അർജന്റീനൻ ക്ലബായ ന്യൂവൽസാണ് എതിരാളികൾ. പ്രീ സീസൺ സൗഹൃദ മത്സരങ്ങളിൽ ഏറെയും വൻ ദുരന്തമായി തീർന്നെങ്കിലും മയാമിക്ക് ന്യൂവൽസുമായുള്ള മത്സരം കുറച്ച് സ്പെഷ്യലാണ്.
മയാമിയുടെ സൂപ്പർതാരം ലയണൽ മെസ്സിയുടെ കൗമാര കാലത്തെ ക്ലബുകളിലൊന്നാണ് ന്യൂവൽസ്. തന്റെ പഴയ ക്ലബിനെ മെസ്സി നേരിടാനൊരുങ്ങുന്നു എന്നത് തന്നെയാണ് ഇതിന്റെ മുഖ്യ ആകർഷണം. മത്സരത്തെ വളരെ വ്യത്യസ്തമായ രീതിയിൽ സ്വാഗതം ചെയ്ത് ഇന്റർ മയാമിയും രംഗത്തെത്തി. വെള്ളിയാഴ്ച രാവിലെ ആറ് മണിക്കാണ് മത്സരം.
മയാമി ജഴ്സിയിൽ സാക്ഷാൽ മെസ്സി ന്യൂവൽസിന്റെ ജഴ്സിയണിഞ്ഞ കുഞ്ഞു മെസ്സിയുടെ കൈപിടിച്ച് നടക്കുന്ന ചിത്രം പോസ്റ്റ് ചെയ്താണ് മത്സരത്തെ വരവേൽക്കുന്നത്. 1995 മുതൽ 2000 വരെ ന്യൂവൽസ് ഓൾഡ് ബോയ്സിലാണ് മെസ്സി പന്തു തട്ടിയിരുന്നത്. തുടർന്നാണ് ബാഴ്സലോണയുടെ യൂത്ത് ടീമിലും സീനിയർ ടീമിലും മെസ്സി നിറഞ്ഞാടുന്നത്.
അതേസമയം, പ്രീ സീസൺ സൗഹൃദ മത്സരങ്ങളിൽ ഏഴ് മത്സരങ്ങളിൽ ആകെ ഒരു ജയം മാത്രമാണ് ഇന്റർമയാമി നേടിയത്. ഒരു സമനിലയും അഞ്ചു തോൽവിയുമാണ് മയാമി ഏറ്റുവാങ്ങിയത്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.