റിയാദ്: പ്രൊഫഷണൽ ഫുട്ബാളിലെ തന്റെ അവസാന സീസണായേക്കാവുന്ന ഈ വർഷത്തിലും ഗോളടിച്ച് തുടങ്ങി പോർച്ചുഗീസ് ഇതിഹാസം ക്രിസ്റ്റ്യാനോ റൊണാൾഡോ. സൗദി പ്രോ ലീഗിൽ അൽ റിയാദിനെതിരെ നടന്ന മത്സരത്തിലാണ് അൽ നസ്റിനായി 41-കാരനായ റൊണാൾഡോ വലകുലുക്കിയത്. ഇതോടെ കരിയറിലെ ആകെ ഗോളുകളുടെ എണ്ണം 977 ആയി. ചരിത്രനേട്ടമായ 1000 ഗോളുകൾ തികയ്ക്കാൻ ഇനി വെറും 23 ഗോളുകൾ മാത്രമാണ് താരത്തിന് വേണ്ടത്.
ഈ സീസൺ തന്റെ അവസാനത്തേതായിരിക്കുമെന്ന് റൊണാൾഡോ അടുത്തിടെ സൂചന നൽകിയിരുന്നു. പങ്കാളി ജോർജിന റോഡ്രിഗസുമായുള്ള വിവാഹത്തിന് ശേഷം അദ്ദേഹം കളിക്കളത്തിലേക്ക് തിരിച്ചെത്തിയ മത്സരം കൂടിയാണിത്. അവധിയായിരുന്നതിനാൽ അൽ നസ്റിന്റെ ആദ്യ മത്സരങ്ങളിൽ (അൽ ഫത്തേഹ്, അൽ ദിരിയ എന്നിവർക്കെതിരെ) താരം കളിച്ചിരുന്നില്ല. റിയാദിനെതിരായ മത്സരത്തിൽ എതിരില്ലാത്ത നാല് ഗോളുകൾക്കാണ് അൽ നസ്റിന്റെ വിജയം.
മത്സരത്തിന്റെ 62-ാം മിനിറ്റിലാണ് പകരക്കാരനായി റൊണാൾഡോ കളത്തിലിറങ്ങിയത്. അപ്പോഴേക്കും അബ്ദുല്ല അൽ-അമ്രി, ഏഞ്ചലോ ഗബ്രിയേൽ, ജാവോ ഫെലിക്സ് എന്നിവരുടെ ഗോളുകളിൽ അൽ നസർ 3-0ന് മുന്നിലെത്തിയിരുന്നു. കളത്തിലിറങ്ങി 21 മിനിറ്റുകൾക്ക് ശേഷം അയ്മാൻ യാഹ്യ നൽകിയ മികച്ചൊരു പാസിൽ നിന്നാണ് റൊണാൾഡോ വലകുലുക്കിയത്.
2022 ഡിസംബറിൽ സൗദി ക്ലബ്ബിലെത്തിയതിന് ശേഷം അൽ നസ്റിനായി റൊണാൾഡോ നേടുന്ന 130-ാം ഗോളാണിത്. ഇതോടെ തുടർച്ചയായ 25 പ്രൊഫഷണൽ സീസണുകളിൽ ഗോൾ നേടുക എന്ന അപൂർവ നേട്ടവും താരം സ്വന്തമാക്കി. കഴിഞ്ഞ സീസണിൽ (2025-26) ക്ലബ്ബിനും രാജ്യത്തിനുമായി 35 ഗോളുകളാണ് റൊണാൾഡോ അടിച്ചുകൂട്ടിയത്.
സീനിയർ പ്രൊഫഷണൽ ഫുട്ബോളിൽ ഇതുവരെ ഒരു താരവും ഔദ്യോഗികമായി 1000 ഗോളുകൾ നേടിയിട്ടില്ല. നിലവിലെ സീസണോടെ ബൂട്ട് അഴിക്കുമെന്ന് അദ്ദേഹം നേരത്തെ സൂചന നൽകിയിരുന്നു. അതുകൊണ്ട് തന്നെ തന്റെ വിരമിക്കൽ സീസണിൽ ഫുട്ബോൾ ചരിത്രത്തിൽ ആരും എത്തിപ്പിടിക്കാത്ത ഈ മാന്ത്രിക സംഖ്യ റൊണാൾഡോ സ്വന്തമാക്കുമോ എന്നാണ് കായിക ലോകം ഇപ്പോൾ ഉറ്റുനോക്കുന്നത്.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.