വിദ്വേഷ പ്രചാരണം: സർക്കാറിന് മൃദുസമീപനമോ?

നാർക്കോട്ടിക്സ്​ ജിഹാദുമായി ബന്ധപ്പെട്ട് സിറോ മലബാർ സഭയുടെ പാലാ രൂപത അധ്യക്ഷൻ നടത്തിയ വിദ്വേഷ പരാമർശങ്ങൾ പുറത്തുവന്നിട്ട് ഒരാഴ്ചയാവുകയാണ്. അടുത്തകാലത്തൊന്നും കേരളം കണ്ടിട്ടില്ലാത്തവിധമുള്ള സാമൂഹിക വിഭജനത്തിന് ഹേതുവായ ആ പ്രഭാഷണത്തി​െൻറ പേരിൽ ഖേദം പ്രകടിപ്പിക്കാനോ വിശദീകരണം നൽകാനോ ബന്ധപ്പെട്ടവർ ഇതുവരെ സന്നദ്ധമായിട്ടില്ല എന്നു മാത്രമല്ല, കൂടുതൽ തീവ്രതയോടെ അത്തരം കാര്യങ്ങൾ വീണ്ടും പ്രചരിപ്പിച്ചുകൊണ്ടിരിക്കുകയാണ്. പാലാ ബിഷപ്പിന് ഐക്യദാർഢ്യം പ്രകടിപ്പിച്ച്​ റാലികൾ നടക്കുന്നു.

കത്തോലിക്കാ സഭയുടെ ഔദ്യോഗിക മുഖപത്രം തന്നെ ബിഷപ്പിനെ ന്യായീകരിച്ച്​ ലേഖനങ്ങളും മുഖപ്രസംഗങ്ങളും പ്രസിദ്ധീകരിക്കുന്നു. സമൂഹമാധ്യമങ്ങളിലാവട്ടെ നിലവിട്ട രീതിയിലുള്ള പ്രചാരണങ്ങളും സജീവമായി നടക്കുന്നു. അത് പോയിപ്പോയി, മുസ്​ലിം കച്ചവട സ്​ഥാപനങ്ങളും ബ്രാൻറുകളും ബഹിഷ്കരിക്കണമെന്ന പ്രചാരണത്തിൽ വരെ എത്തിനിൽക്കുകയാണ്.

പാലാ ബിഷപ്പിെൻറ വിദ്വേഷ പ്രഭാഷണം സംബന്ധിച്ച ചർച്ചകൾ ഒരു ഭാഗത്ത് നടക്കവെയാണ് താമരശ്ശേരി രൂപതക്ക് കീഴിലെ വിശ്വാസ പരിശീലന കേന്ദ്രം പുറത്തിറക്കിയ പുസ്​തകം വാർത്തയാവുന്നത്. 'സത്യങ്ങളും വസ്​തുതകളും 33 ചോദ്യങ്ങളിലൂടെ' എന്ന തലക്കെട്ടിൽ പുറത്തിറക്കിയ പുസ്​തകം ആദ്യമധ്യാന്തം വർഗീയതയും മുസ്​ലിം വിദ്വേഷവും അന്ധവിശ്വാസവും പ്രചരിപ്പിക്കുന്നതാണ്. പ​ത്രത്തിൽ എടുത്ത്​ ഉദ്ധരിക്കാൻപോലും പറ്റാത്തതരം പ്രയോഗങ്ങൾ അതിലുണ്ട്. ക്രൈസ്​തവ പെൺകുട്ടികളെ വശീകരിക്കാൻ മുസ്​ലിം പുരോഹിതർ ആഭിചാര ക്രിയ നടത്തുന്നുവെന്നടക്കം വിചിത്ര ആരോപണങ്ങളും പുസ്​തകം ഉന്നയിക്കുന്നുണ്ട്.

ഈദ്, റമദാൻ തുടങ്ങിയ സവിശേഷ അവസരങ്ങളിൽ മുസ്​ലിം വീടുകളിലേക്ക് ക്രൈസ്​തവ കുട്ടികളെ ക്ഷണിക്കുന്നതിനെപോലും പുസ്​തകം അപകടകരമായാണ് കാണുന്നത്. രൂപതയിലെ കുട്ടികളെ പഠിപ്പിക്കാനായാണ് ഈ പുസ്​തകം തയാറാക്കിയിരിക്കുന്നത് എന്നറിയുമ്പോഴാണ് വിഷയത്തി​െൻറ ഗൗരവം നാം മനസ്സിലാക്കുക. നേരത്തേ സമൂഹ മാധ്യമങ്ങളിലൂടെ പ്രചരിപ്പിക്കപ്പെട്ടിരുന്ന, ഉത്തരവാദികളില്ലാത്ത സന്ദേശങ്ങൾക്ക് ഔദ്യോഗിക സ്വഭാവം കൈവരുന്നുവെന്നാണ് ഇതു കാണിക്കുന്നത്. വാട്സ്​ആപ്​ ഗ്രൂപ്പുകളെപോലും നാണിപ്പിക്കുന്ന വിദ്വേഷ പ്രചാരണം ചിലർ ഔദ്യോഗികമായി ഏറ്റെടുത്തതി​െൻറ രേഖയാണ് ഈ പുസ്​തകം.

വിദ്വേഷ, വർഗീയ പ്രചാരണങ്ങളെ നിയന്ത്രിക്കാൻ ആവശ്യമായ നിയമങ്ങൾ നമ്മുടെ നാട്ടിൽ വേണ്ടതുപോലെ ഉണ്ട്. മുൻകാലങ്ങളിൽ നാം അത് പ്രയോഗിച്ചിട്ടുണ്ട്. സമൂഹത്തിൽ കാലുഷ്യമുണ്ടാക്കുന്നവരെ കർക്കശമായി കൈകാര്യം ചെയ്യുക തന്നെയാണ് വേണ്ടത്. മുമ്പ്, ആൾതുളയിൽ വീണ മനുഷ്യരെ രക്ഷിക്കാൻ ശ്രമിക്കുന്നതിനിടെ മരണപ്പെട്ട നൗഷാദ്​ എന്ന സാമൂഹിക പ്രവർത്തകന് സർക്കാർ സഹായം പ്രഖ്യാപിച്ചപ്പോൾ വർഗീയ ചുവയുള്ള പ്രസ്​താവന നടത്തിയ എസ്​.എൻ.ഡി.പി നേതാവ് വെള്ളാപ്പള്ളി നടേശനെതിരെ കേരളത്തിൽ കേസെടുത്തിട്ടുണ്ട്. വിദ്വേഷ പ്രഭാഷണം നടത്തിയതിന്​ സലഫി പ്രഭാഷകൻ ഷംസുദ്ദീൻ പാലത്തിനെതിരെ യു.എ.പി.എ ചാർത്തിയിരുന്നു.

എന്നാൽ, ഇവിടെ ഇത്രയും മാരകമായ തോതിൽ വർഗീയ പ്രചാരണം നടക്കുമ്പോൾ സംസ്​ഥാന സർക്കാറും ആഭ്യന്തര വകുപ്പും വലിയ നിസ്സംഗതയാണ് പുലർത്തുന്നത്. വാർത്തസമ്മേളനത്തിൽ തദ്സംബന്ധമായി ഉന്നയിക്കപ്പെട്ട ചോദ്യത്തിന് ബിഷപ്പിെൻറ പ്രഭാഷണം ശരിയായില്ല എന്ന മൃദുവായ മറുപടി നൽകുന്നതിലൊതുങ്ങി മുഖ്യമന്ത്രിയുടെ ഇടപെടൽ. സി.പി.എം സംസ്​ഥാന സെക്രട്ടറി വിജയരാഘവനാവട്ടെ, എവിടെ നിന്നെങ്കിലും എന്തെങ്കിലും കേൾക്കുമ്പോഴേക്ക് പ്രതികരിക്കേണ്ട ആവശ്യമില്ല എന്നാണ് പ്രതികരിച്ചത്. ബുധനാഴ്ച നടന്ന വാർത്തസമ്മേളനത്തിൽ ബിഷപ്പിനെതിരെ കേസെടുക്കാൻ ആലോചനയില്ലെന്ന് മുഖ്യമന്ത്രി കൃത്യമാക്കുകയും ചെയ്തു.

മുസ്​ലിം സമൂഹത്തെ ലക്ഷ്യമാക്കി നടക്കുന്ന വിദ്വേഷ പ്രചാരണങ്ങളുടെ കാര്യത്തിൽ ഇരട്ട സമീപനം സ്വീകരിക്കുന്നു എന്ന വികാരം ആ സമൂഹത്തിൽ ശക്​തിപ്പെടുത്തുന്നതാണ് സർക്കാറിെൻറയും ഭരണകക്ഷിയുടെയും നിലപാടുകൾ. സമൂഹത്തിൽ കാലുഷ്യമുണ്ടാക്കുന്നത് ആരാണെങ്കിലും നിർദാക്ഷിണ്യം നേരിടുകയാണ് വേണ്ടത്. അതിനോട് അലസ സമീപനം സ്വീകരിച്ചാൽ കൂടുതൽ വലിയ കുഴപ്പത്തിലാണ് നാട് എത്തിച്ചേരുക. വിവിധ മതസമൂഹങ്ങൾ ഇടകലർന്ന് ജീവിക്കുന്ന ഒരു നാട്ടിൽ ഒരു വിഭാഗത്തെ ഒറ്റപ്പെടുത്തിയും പൈശാചികവത്​കരിച്ചും എളുപ്പം മുന്നോട്ടുപോവാൻ കഴിയുമെന്ന സന്ദേശം വിദ്വേഷ പ്രചാരകർക്ക് നൽകുന്നത് നല്ലതല്ല. അൽപം കൂടി ഉത്തരവാദിത്ത ബോധത്തോടെയും ഗൗരവത്തോടെയും വിഷയത്തെ സമീപിക്കാൻ സർക്കാർ സന്നദ്ധമാകണം.