ഓട്ടോയും ബസും കൂട്ടിയിടിച്ച് രണ്ടുപേർക്ക് പരിക്ക്

പെരുമ്പിലാവ്: കെ.എസ്.ആർ.ടി.സി ബസും ഓട്ടോയും കൂട്ടിയിടിച്ച് ഓട്ടോ യാത്രക്കാരായ രണ്ടുപേർക്ക് പരിക്ക്. ചാലിശേരി കൗക്കോട് ചെറുവത്തൂർ പീറ്റർ (55), ചാലിശേരി പുലിക്കോട്ടിൽ വിജു (48) എന്നിവർക്കാണ് പരിക്കേറ്റത്. ഇവരെ തൃശൂർ അശ്വിനി ആശുപത്രിയിൽ പ്രവേശിപ്പിച്ചു. ഞായറാഴ്ച രാത്രി എട്ടരയോടെ ചൂണ്ടൽ-കുറ്റിപ്പുറം സംസ്ഥാന പാതയിലെ കൊരട്ടിക്കര പെട്രോൾ പമ്പിന് മുന്നിലായിരുന്നു അപകടം. ഇടിയുടെ ആഘാതത്തിൽ ഓട്ടോ പൂർണമായും തകർന്നു. ശബ്ദം കേട്ട് ഓടിക്കൂടിയവരാണ് ഓട്ടോയിൽ കുടുങ്ങിയവരെ പുറത്തെടുത്ത് ആശുപത്രിയിൽ എത്തിച്ചത്. അപകടത്തെ തുടർന്ന് സംസ്ഥാന പാതയിൽ ഗതാഗതം തടസ്സപ്പെട്ടു. പെരുമ്പിലാവിൽ നിന്ന് ചാലിേശരിയിലേക്ക് പോകുകയായിരുന്നു ഓട്ടോ യാത്രക്കാർ. സംഭവ സമയം വിജുവാണ് ഓട്ടോ ഓടിച്ചിരുന്നത്. കോഴിക്കോട് നിന്ന് തിരുവനന്തപുരത്തേക്ക് പോയ ബസാണ് ഇടിച്ചത്. പരിക്കേറ്റ ഇരുവരും തീവ്രപരിചരണ വിഭാഗത്തിലാണ്.