യു.പിയിലേക്ക്​ കണ്ണൂരിൽനിന്ന്​ ഇന്ന്​ ട്രെയിൻ

കണ്ണൂർ: അന്തർസംസ്ഥാന തൊഴിലാളികൾക്കായി ഞായറാഴ്ച കണ്ണൂരിൽനിന്ന് യു.പിയിലേക്ക് പ്രത്യേക ട്രെയിൻ പുറപ്പെടും. 1140 തൊഴിലാളികളാണ് യാത്ര ചെയ്യുക. ജില്ല ഭരണകൂടം ഒരുക്കം പൂർത്തിയാക്കിയിട്ടുണ്ട്. വ്യാഴാഴ്ച 1140 തൊഴിലാളികളുമായി ഒരു ട്രെയിൽ കണ്ണൂരിൽനിന്ന് പോയിരുന്നു. യു.പിയിലേക്കുള്ള രണ്ടാമത്തെ ട്രെയിനാണ് ഞായറാഴ്ച വൈകീട്ട് അഞ്ചിന് പുറപ്പെടുന്നത്. 930 രൂപയാണ് ട്രെയിൻ ചാർജ്. നേരത്തേ ഒഡിഷയിലേക്കും ഇത്രതന്നെ തൊഴിലാളികളുമായി മറ്റൊരു ട്രെയിൻ കണ്ണൂരിൽനിന്ന് പോയിരുന്നു. എന്നാൽ, ബിഹാറിലേക്കും ഝാർഖണ്ഡിലേക്കും തീരുമാനിച്ചിരുന്ന ട്രെയിനുകൾ അതത് സർക്കാറുകളുടെ അനുമതി കിട്ടാത്തതിനെ തുടർന്ന് റെയിൽവേ റദ്ദാക്കിയിരുന്നു.