തിരുവനന്തപുരം: ബാലരാമപുരത്ത് ഉറങ്ങിക്കിടന്ന രണ്ടര വയസ്സുകാരി ദേവേന്ദുവിനെ കിണറ്റിലെറിഞ്ഞു കൊലപ്പെടുത്തിയ കേസില് റിമാന്ഡിലായിരുന്ന അമ്മാവന് ഹരികുമാർ മൊഴി മാറ്റി. കസ്റ്റഡി അപേക്ഷ പരിഗണിക്കവെയാണ് താനല്ല കുട്ടിയെ കൊലപ്പെടുത്തിയതെന്നു ഹരികുമാര് മൊഴിമാറ്റുകയും കരയുകയും ചികിത്സ ആവശ്യപ്പെടുകയും ചെയ്തിരിക്കുന്നത്. ഇതിനിടെ, അമ്മാവൻ ഹരികുമാറിന് മാനസികപ്രശ്നങ്ങള് ഇല്ലെന്ന് മെഡിക്കല് കോളജ് ആശുപത്രിയിലെ മാനസികരോഗ വിഭാഗം അറിയിച്ചു.
കോടതിയുടെ നിര്ദേശപ്രകാരം ഹരികുമാറിനെ പരിശോധിച്ച സൈക്യാട്രി വിഭാഗം വിദഗ്ധരാണ് ഈ നിഗമനത്തില് എത്തിയത്. രണ്ടു ദിവസത്തെ നിരീക്ഷണത്തിനു ശേഷം ഇതുസംബന്ധിച്ച് കോടതിയില് റിപ്പോര്ട്ട് നല്കും.
ഹരികുമാറിനെ അഞ്ചു ദിവസത്തെ കസ്റ്റഡിയില് വേണമെന്നാണ് പൊലീസ് ആവശ്യപ്പെട്ടിരുന്നത്. കോടതി ഇത് അംഗീകരിച്ചില്ല. കോടതിയില് മാനസിക അസ്വാസ്ഥ്യം പ്രകടിപ്പിച്ചതിനാല് മാനസിക രോഗവിദഗ്ധന്റെ സര്ട്ടിഫിക്കറ്റ് കോടതി ആവശ്യപ്പെട്ടു. ഇതിനായി ഇന്നലെ ഉച്ചയോടെ മെഡിക്കല് കോളജ് ആശുപത്രിയില് എത്തിച്ചെങ്കിലും സര്ട്ടിഫിക്കറ്റ് ലഭിച്ചിരുന്നില്ല. തുടര്ന്ന് ഇന്നാണു ഹരികുമാറിനെ പരിശോധനക്ക് വിധേയമാക്കിയത്.
വ്യാജ രേഖ ചമയ്ക്കലിനും സാമ്പത്തിക തട്ടിപ്പിനും അറസ്റ്റിലായി അട്ടക്കുളങ്ങര വനിത ജയിലില് കഴിയുന്ന കുട്ടിയുടെ മാതാവ് ശ്രീതുവിനെ പൊലീസ് ഇന്നു കസ്റ്റഡിയില് വാങ്ങും. ദേവസ്വം ബോര്ഡില് ഡ്രൈവര് ജോലിയുടെ നിയമന ഉത്തരവ് നല്കി ബാലരാമപുരം നെല്ലിവിള സ്വദേശിയായ ജെ. ഷിജുവില് നിന്ന് 10 ലക്ഷം രൂപ വാങ്ങി കബളിപ്പിച്ചുവെന്ന പരാതിയിലാണ് ശ്രീതു റിമാന്ഡില് കഴിയുന്നത്. സാമ്പത്തിക ഇടപാടുമായി ബന്ധപ്പെട്ട 10 പരാതികളില് ശ്രീതുവിന്റെ മാതാവ് ശ്രീകലയെ നെയ്യാറ്റിന്കര, മാരായമുട്ടം എസ്.എച്ച്.ഒമാരുടെ നേതൃത്വത്തില് ചോദ്യം ചെയ്തു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.