കനത്ത മഴ, മലവെള്ളപ്പാച്ചിൽ; കോട്ടയത്ത്​ വിദ്യാർഥിനിയെയും പത്തനംതിട്ടയിൽ വയോധികയെയും കാണാതായി

പത്തനംതിട്ട/ പാലാ: പത്തനംതിട്ട, കോട്ടയം ജില്ലകളിലെ ചില ഭാഗങ്ങളിലുണ്ടായ കനത്ത മഴയിൽ വ്യാപക നാശം. രണ്ടു ജില്ലകളിലായി രണ്ടുപേരെ ഒഴുക്കിൽപെട്ട്​ കാണാതായി. പാലാ ഭരണങ്ങാനത്ത്​ ഒമ്പതാം ക്ലാസ്​ വിദ്യാർഥിനിയെയും പത്തനംതിട്ട നാരങ്ങാനത്ത്​ വയോധികയെയുമാണ്​ കാണാതായത്​.

പത്തനംതിട്ട ഇലന്തൂരിലെ കൊട്ടതട്ടി മല, നഗരത്തോട്​ ചേർന്ന ചുരുളിക്കോട്​, ചെന്നീർക്കര എന്നിവിടങ്ങളിൽ ഉരുൾപൊട്ടലുണ്ടായി. ഇവി​ടങ്ങളിൽനിന്ന്​ നിരവധി കുടുംബങ്ങളെ മാറ്റിപ്പാർപ്പിച്ചു. മഴവെള്ളപ്പാച്ചിലിനെത്തുടർന്ന്​ കാല്‍വഴുതി തോട്ടിൽവീണാണ്​ ഒമ്പതാം ക്ലാസ്​ വിദ്യാർഥിനി ഭരണങ്ങാനം ചിറ്റാനപ്പാറ പൊരിയത്ത് സിബിച്ചന്‍റെ മകള്‍ മരിയയെ കാണാതായത്. സ്‌കൂള്‍ വിട്ട് വീട്ടിലേക്ക്​ വരുന്നതിനിടെ ബുധനാഴ്ച വൈകീട്ട് അഞ്ചോടെ ചിറ്റാനപ്പാറക്ക്​ സമീപമായിരുന്നു അപകടം. ചിറ്റാനപ്പാറ-അയ്യമ്പാറ റോഡിലൂടെ പോകുന്നതിനിടെ ശക്തമായ മഴയെത്തുടർന്നുണ്ടായ മഴവെള്ളപ്പാച്ചിലില്‍ കാല്‍വഴുതിയ വിദ്യാര്‍ഥിനി കുന്നേമുറി കൈത്തോട്ടിലേക്ക് വീഴുകയായിരുന്നു.

ഒപ്പമുണ്ടായിരുന്ന കൂട്ടുകാരിയും ശക്തമായ ഒഴുക്കില്‍പെട്ട് റോഡില്‍ വീണു. ഈ സമയം ഇതുവഴി കടന്നുപോയ സ്‌കൂള്‍ബസിലെ ഡ്രൈവര്‍ ഓടിയെത്തി പിടിച്ചെങ്കിലും മരിയ പിടിവിട്ട് ഒഴുക്കില്‍പെടുകയായിരുന്നു. മറ്റേ കുട്ടിയെ രക്ഷപ്പെടുത്തി.

പാലാ അഗ്​നിരക്ഷാസേനയും പൊലീസും സ്ഥലത്തെത്തിയെങ്കിലും കനത്ത മഴ തിരച്ചില്‍ ദുഷ്‌കരമാക്കി. ഈരാറ്റുപേട്ടയിലെ നന്മ സന്നദ്ധ പ്രവർത്തകരും തിരച്ചിലിനെത്തി. കനത്ത മഴയും വെളിച്ചക്കുറവുംമൂലം രാത്രി 7.30ന്​ രക്ഷാപ്രവർത്തനം നിർത്തിവെച്ചു. നാരങ്ങാനത്ത്​ ബുധനാഴ്ച ഉച്ചകഴിഞ്ഞ് വെസ്റ്റ് വലിയകുളത്ത് തോട്ടിൽ കുളിക്കാനിറങ്ങിയ സുധർമയെയാണ്​ (71) കാണാതായത്​. അഗ്​നിരക്ഷാ സേനയും ആറന്മുള പൊലീസും ചേർന്ന്​ തിരച്ചിൽ നടത്തിയെങ്കിലും കണ്ടെത്താനായില്ല. രാത്രിയിലും തിരച്ചിൽ നടത്തുന്നുണ്ട്​.

പത്തനംതിട്ടയിൽ കേന്ദ്ര കാലാവസ്ഥ വകുപ്പ് റെഡ് അലർട്ട് പ്രഖ്യാപിച്ചു. ശബരിമല തീര്‍ഥാടകര്‍ക്ക്​ ജാഗ്രത നിർദേശം നൽകിയിട്ടുണ്ട്​. ഉച്ച​ക്കു​ശേഷം പത്തനംതിട്ട നഗരപ്രദേശങ്ങളിലും മറ്റുമായി 200 മില്ലീമീറ്ററിന് മുകളിൽ മഴ ലഭിച്ചു. ജില്ലയിലെ മലയോര മേഖലകളിലേക്കുള്ള രാത്രിയാത്രയും വിനോദസഞ്ചാര പ്രവര്‍ത്തനങ്ങളും കലക്ടർ എ. ഷിബു നിരോധിച്ചു.