കോഴിക്കോട്: ബഹ്റൈനില് നിന്ന് ചൊവ്വാഴ്ച പുലർച്ച 12.30ന് കരിപ്പൂർ വിമാനത്താവളത്തിൽ വന്നിറങ്ങിയ പ്രവാസികളില് നാല് പേര്ക്ക് കോവിഡ് ലക്ഷണങ്ങള്. കോഴിക്കോട് സ്വദേശികളായ മൂന്ന് പേര്ക്കും പാലക്കാട് സ്വദേശിയായ ഒരാള്ക്കുമാണ് ആദ്യ ഘട്ട പരിശോധനയില് രോഗ ലക്ഷണങ്ങള് കണ്ടെത്തിയത്.
ഇവരെ മറ്റു യാത്രക്കാര്ക്കൊപ്പം വിമാനത്താവളത്തിനുള്ളില് പ്രവേശിപ്പിക്കാതെ റണ്വെയില്ത്തന്നെ ആംബുലന്സുകള് കൊണ്ടുവന്ന് കോഴിക്കോട് ഗവ. മെഡിക്കല് കോളജ് ആശുപത്രിയിലെ ഐസൊലേഷന് കേന്ദ്രത്തിലേക്ക് മാറ്റി. ദുബൈയിൽ നിന്ന് നെടുമ്പാശ്ശേരി അന്താരാഷ്ട്ര വിമാനത്താവളത്തിലെത്തിയ രണ്ട് പ്രവാസികൾക്കും കോവിഡ് ലക്ഷണങ്ങൾ കണ്ടെത്തി. ഇവരെ കളമശ്ശേരി മെഡിക്കൽ കോളജ് ആശുപത്രിയിലേക്ക് മാറ്റി.
കരിപ്പൂർ വിമാനത്താവളത്തിലെത്തിയവരിൽ കോവിഡ് ലക്ഷണങ്ങളില്ലെങ്കിലും ചില ആരോഗ്യ പ്രശ്നങ്ങള് അനുഭവപ്പെട്ടതിനെ തുടർന്ന് മൂന്ന് പേരെ കോഴിക്കോട് മെഡിക്കല് കോളജ് ആശുപത്രിയിലേക്കും ഒരാളെ സ്വകാര്യ ആശുപത്രിയിലേക്കും മാറ്റി.
കണ്ണൂര് സ്വദേശിനിയായ ഗര്ഭിണിയേയും ഹൃദയ ശസ്ത്രക്രിയ കഴിഞ്ഞ പത്തനംതിട്ട സ്വദേശിയേയും ഫിസ്റ്റുലക്ക് ചികിത്സയിലുള്ള കോഴിക്കോട് സ്വദേശിയേയുമാണ് മെഡിക്കൽ കോളജ് ആശുപത്രിയിൽ പ്രവേശിപ്പിച്ചത്. അസ്ഥിരോഗത്തിന് ചികിത്സക്കായെത്തിയ മലപ്പുറം സ്വദേശിയെയാണ് കോഴിക്കോട്ടെ സ്വകാര്യ ആശുപത്രിയിലേക്ക് മാറ്റിയത്. ആരോഗ്യ വകുപ്പ് ഏര്പ്പെടുത്തിയ 108 ആംബുലന്സുകളിലാണ് ഇവരെ വിമാനത്താവളത്തില് നിന്ന് കൊണ്ടുപോയത്.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.