കെവിൻ കൊല്ലപ്പെട്ടത്​ ഷാനു മണിക്കൂറുകൾക്കകം അറിയിച്ചുവെന്ന്​ ചാക്കോയുടെ സുഹൃത്ത്​

കോട്ടയം: കെവിൻ വധക്കേസിലെ വിചാരണയുടെ മൂന്നാം ദിവസം പ്രതികൾക്കെതിരെ നിർണായക മൊ​ഴി നൽകി നീനുവിൻെറ പിതാവിൻെറ സുഹൃത്ത്​. കെവിൻെറ കൊലപാതകം ഷാനു വിളിച്ച്​ അറിയിച്ചിരുന്നുവെന്നായിരുന്നു മൊഴി

കെവിനെയും ബന്ധു അനീഷിനെ യും കോട്ടയത്തു നിന്ന്​ പിടിച്ചുകൊണ്ടുപേയത്​ നീനുവിനെ തിരിച്ചു കിട്ടാൻ വേണ്ടിയായിരുന്നുവെന്നും കൊലപാതകം ചെയ്​തിട്ടില്ലെന്നാണ്​ പ്രതിഭാഗം വാദിച്ചിരുന്നത്​. ഇത്​ ഖണ്ഡിക്കുന്നതാണ്​ ലി​േജായുടെ മൊഴി​.

മെയ്​ 27ാം തീയതി രാവിലെ ഏഴുമണിയോടെ തന്നെ ഷാനു വിളിച്ചു. കെവിൻ കൊല്ലപ്പെട്ടു. കൂടെയുണ്ടായിരുന്ന അനീഷിനെ വിടുകയാണ്​ എന്ന്​ ഷാനു പറഞ്ഞതായി ലിജോ മൊഴി നൽകി.

കൊലപാതകത്തിന്​ പിന്നിൽ വൻ ഗൂഢാലോചന നടന്നിട്ടുണ്ടെന്നതിൻെറ തെളിവാണിതെന്നാണ്​ പ്രൊസിക്യൂഷൻെറ വാദം. കൊലപാതകത്തിന്​ രണ്ടു ദിവസം മുമ്പ്​ ചാക്കോയെയും കൂട്ടി ലിജോ കോട്ടയത്തെത്തി കെവിനെയും നീനുവിനേയും പൊലീസ്​ സ്​റ്റേഷനിലേക്ക്​ വിളിപ്പിച്ച്​ ഒത്തുതീർപ്പ്​ ശ്രമം നടത്തിയിരുന്നു. അന്ന്​ ലിജോയുടെ മുന്നിൽ വെച്ചാണ്​ കെവിനൊപ്പം പോവുകയാണെന്ന്​ നീനു പൊലീസിനോട്​ പറഞ്ഞത്​. അങ്ങനെ എഴുതിക്കൊടുക്കുകയും ചെയ്​താണ്​ നീനു പോയത്​.

അതിനു ശേഷം കെവിൻെറ ചിത്രങ്ങളടക്കം ഷാനുവിന്​ അയച്ചുകൊടുത്തത്​ താനാണ്​ എന്നും ലിജോ മൊഴി നൽകിയിട്ടുണ്ട്​. ഇന്ന്​ രാവിലെ കേസിലെ പ്രധാന സാക്ഷിയായ അനീഷിനെയും വിസ്​തരിച്ചിരുന്നു.