തിരുവനന്തപുരം: തലശേരി മലബാര് കാന്സര് സെന്ററില് കാന്സറിനുള്ള റോബോട്ടിക് സര്ജറി സംവിധാനം യാഥാര്ഥ്യ മായെന്ന് മന്ത്രി വീണ ജോര്ജ്. കാന്സറിനുള്ള അഞ്ച് റോബോട്ടിക് സര്ജറികള് വിജയകരമായി ഇതുവരെ പൂര്ത്തിയായി. വൃക്ക, ഗര്ഭാശയം, മലാശയം എന്നിവയെ ബാധിച്ച കാന്സറുകള്ക്കാണ് റോബോട്ടിക് സര്ജറി നടത്തിയത്. തിങ്കളാഴ്ച മുതല് റോബോട്ടിക് സര്ജറികള് സാധാരണ പോലെ നടക്കും.
ആർ.സി.സിക്ക് പുറമേ എംസിസിയിലും റോബോട്ടിക് സര്ജറി യാഥാർഥ്യമായതോടെ സംസ്ഥാനത്ത് കാന്സര് ചികിത്സാ രംഗത്ത് മറ്റൊരു നാഴികക്കല്ല് കൂടി പിന്നിടുകയാണ്. അപ്രാപ്യമായിരുന്ന ഹൈടെക് ചികിത്സാ സങ്കേതങ്ങള് സാധാരണക്കാര്ക്ക് ലഭ്യമാക്കുകയാണ് ഇതിലൂടെ ലക്ഷ്യമിടുന്നതെന്നും മന്ത്രി വ്യക്തമാക്കി. ശസ്ത്രക്രിയക്ക് നേതൃത്വം നല്കിയ മുഴുവന് ടീമിനേയും മന്ത്രി അഭിനന്ദിച്ചു.
ഇന്ത്യയിലും വിദേശത്തുമുള്ള വന്കിട ആശുപത്രികളില് മാത്രം ലഭ്യമായിരുന്ന റോബോട്ടിക് സര്ജറി യൂനിറ്റ് സര്ക്കാര് മേഖലയില് ആദ്യമായാണ് ആരംഭിച്ചത്. ആര്.സി.സി.യിലും എം.സി.സി.യിലും റോബോട്ടിക് സര്ജറി സംവിധാനവും (60 കോടി), ഡിജിറ്റല് പത്തോളജി മികവിന്റെ കേന്ദ്രങ്ങളും (18.87 കോടി) സജ്ജമാക്കുന്നതിന് റീബിള്ഡ് കേരള ഇനിഷ്യേറ്റീവിലൂടെയാണ് തുകയനുവദിച്ചിരുന്നത്. ഇതുകൂടാതെ തിരുവനന്തപുരം മെഡിക്കല് കോളജിലും റോബോട്ടിക് സര്ജറി ആരംഭിക്കുന്നതിന് തുകയനുവദിച്ചിട്ടുണ്ട്.
മിനിമല് ആക്സസ് ശസ്ത്രക്രിയയാണ് റോബോട്ടിക് സര്ജറി. ഇത് സര്ജിക്കല് റോബോട്ടിന്റെ സഹായത്തോടു കൂടിയാണ് നടത്തുന്നത്. വിവിധ തരത്തിലുള്ള കാന്സറുകളുടെ ചികിത്സക്ക് റോബോട്ടിക് ശസ്ത്രക്രിയ ഫലപ്രദമാണ്. രോഗിയുടെ വേദന കുറക്കുക, എത്രയും വേഗം സാധാരണ ജീവിതത്തിലേക്ക് തിരിച്ചുകൊണ്ടു വരിക, ശസ്ത്രക്രിയക്കിടയിലുള്ള രക്തസ്രാവം നന്നായി കുറക്കാന് സാധിക്കുക എന്നിവയൊക്കെയാണ് റോബോട്ടിക് ശസ്ത്രക്രിയയുടെ പ്രധാന ഗുണങ്ങള്.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.