ഉള്ളിവില കുതിക്കുന്നു; കോഴിക്കോട്ട്​ നൂറ്

കോഴിക്കോട്: ഉള്ളിമുറിച്ചാൽ കണ്ണെരിയുമെന്നത്​ മാറി​ ഉള്ളി കണ്ടാൽതന്നെ കണ്ണിൽ വെള്ളം നിറയുന്നകാലമെത്തി. സവ ാളക്ക്​ കോഴിക്കോട്​ മാർക്കറ്റിൽ ഞായറാഴ്​ച കിലോക്ക്​ ചില്ലറ വില 100 രൂപയെത്തി. പാളയം മാർക്കറ്റിൽ മൊത്ത വില ക ിലോക്ക്​ 94ലെത്തിയതിനെ തുടർന്നാണിത്​. വെള്ളിയാഴ്​ച 90 രൂപയുണ്ടായിരുന്നതാണ്​ ഒറ്റദിവസംകൊണ്ട്​ കുതിച്ചുയർന്ന ത്​. ചരിത്രത്തിൽ ആദ്യമാണ്​ വലിയ ഉള്ളിവില 100 കടക്കുന്നതെന്ന്​ കച്ചവടക്കാർ പറഞ്ഞു.

കിലോക്ക്​ എട്ടു​ രൂപവരെ വിറ്റതാണ്​ മാസങ്ങൾക്കകം കുതിച്ചുയർന്നത്​. വരും ദിവസങ്ങളിൽ വില മുന്നോട്ട്​ കുതിക്കാനാണ്​ സാധ്യത. ദൗർലഭ്യം കണക്കിലെടുത്ത്​ ഈജിപ്​തിൽനിന്ന്​ ഇറക്കുമതിചെയ്​ത ഉള്ളി ലോഡുകളും ഞായറാഴ്​ച മുതൽ കോഴിക്കോട്ട്​ എത്തിത്തുടങ്ങി. മുംബൈ വഴിയാണ്​ ഇവയെത്തിയത്​. കടും ചുവപ്പ്​ നിറത്തിലുള്ള വിദേശ ഉള്ളിക്കും വില 100 തന്നെയാണ്​ ഈടാക്കുന്നത്​. ഉത്തരേന്ത്യയിൽ പുതിയ ഉള്ളിവിളവെടുപ്പ്​ തുടങ്ങുന്ന ഡിസംബർ അവസാനം വരെ വിലക്കൂടുതൽ തുടരുമെന്നാണ്​ പറയുന്നത്​. ഉത്തരേന്ത്യയിൽ നേരത്തേ സംഭരിച്ച്​ വച്ച ഉള്ളിയാണ്​ ഇപ്പോൾ വിപണിയിൽ എത്തുന്നത്​. എന്നാൽ മാർക്കറ്റിടിവ്​ ഭയന്ന്​ ഉള്ളി കൂടുതൽ സംഭരിക്കാൻ കോഴിക്കോ​ട്ടെ കച്ചവടക്കാർ മടിക്കുന്നു.

മഹാരാഷ്​ട്രയിലെ പ്രളയവും കൃഷിനാശവുമാണ്​ വൻ വിലക്കയറ്റത്തിന്​ കാരണം. ചുവപ്പ്​, റോസ്​ എന്നീ രണ്ടിനം ഉള്ളികളാണ്​ വിപണിയിൽ സാധാരണയായെത്താറ്​. പെ​ട്ടെന്ന്​ കേടാവാത്ത, ജല സാന്നിധ്യം കുറഞ്ഞ ചുവപ്പ്​ ഇനത്തിനാണ്​ വില കൂടുതൽ ഈടാക്കിയിരുന്നത്​. എന്നാൽ, ക്ഷാമം തുടങ്ങിയതോടെ എല്ലായിനങ്ങൾക്കും ഒരേ വിലയായി. വൻ വിലക്കയറ്റം കല്യാണ വീട്ടുകാർക്കും ഹോട്ടൽ വ്യാപാരികൾക്കും തിരിച്ചടിയായി. ബിരിയാണിയടക്കം മാംസഭക്ഷണക്കൂട്ടുകൾക്ക്​ ഒഴിച്ചു കൂടാനാവാത്തയിനമാണ്​ ഉള്ളി. കല്യാണവീട്ടിൽ രണ്ടു ചാക്ക്​ ഉള്ളികിട്ടാൻ 10,000 രൂപയെങ്കിലും വേണമെന്നയവസ്ഥയായി. കോഴിക്കോടൻ ഹോട്ടലുകളിലെ പ്രധാന ഇനങ്ങളായ​ ഉള്ളിവടയും മുട്ടറോസ്​റ്റുമൊക്കെ സവാളവില കൈവിട്ടതോടെ അപ്രത്യക്ഷമായിത്തുടങ്ങി.

മുരിങ്ങക്കായക്കും മൂത്ത വില
കോഴിക്കോട്​: ബിരിയാണിയെ​പോലെതന്നെ​ സാമ്പറുണ്ടാക്കാനും ചെലവേറി. ബിരിയാണിക്ക്​ ഒഴിച്ചുകൂടാനാവാത്ത​​ സവാളയുടെ വിലക്കയറ്റമാണ്​ തിരിച്ചടിയെങ്കിൽ മുരിങ്ങക്കായ ക്ഷാമമാണ്​ സാമ്പാറി​​െൻറ പ്രശ്​നം. ഒരു കിലോ മുരിങ്ങക്കായക്ക്​ 150 ​രൂപയാണ്​ ​ഞായറാഴ്ച​ കോഴിക്കോ​ട്ടെ ചില്ലറ വില. കഴിഞ്ഞയാഴ്​ച 300 രൂപ വരെ ഉയർന്ന വില, താഴ്​ന്നത്​ ആശ്വാസമെങ്കിലും ഉയരാൻ സാധ്യതയുണ്ടെന്ന്​ കച്ചവടക്കാർ പറയുന്നു. പച്ചക്ക്​ പകരം ഉണങ്ങിയ തൊലിയുള്ള കായകളാണ്​ ഇപ്പോൾ വിപണിയിൽ കിട്ടുന്നത്​്. തമിഴ്​നാട്ടിൽനിന്ന്​ മുരിങ്ങക്കായ വരാത്തതും നാട്ടിൽ വിളവില്ലാത്തതുമാണ്​ മുഖ്യകാരണം. ഒഡിഷ, ഗുജറാത്ത്​ എന്നിവിടങ്ങളിൽനിന്ന്​ കൂടുതൽ മുരിങ്ങക്കായയെത്തുമെന്ന്​​ പ്രതീക്ഷിക്കുന്നതായി​ കടക്കാർ പറഞ്ഞു.