കോട്ടയത്ത് പള്ളിമേൽക്കൂരയിൽ നിന്നുവീണ് കൈക്കാരന് ദാരുണാന്ത്യം

കോട്ടയം: അറ്റകുറ്റപ്പണിക്കിടെ പള്ളി മേൽക്കൂരയിൽനിന്ന് വീണ് കൈക്കാരന് ദാരുണാന്ത്യം. അപകടത്തിൽ രണ്ട് പേർക്ക് പരിക്കേറ്റു. ഞായറാഴ്ച ഉച്ചക്ക്​ കുറുപ്പന്തറ മണ്ണാറപ്പാറ സെന്‍റ്​ സേവ്യേഴ്‌സ് പള്ളിയിലാണ് സംഭവം.

കുറുപ്പന്തറ കുറുപ്പംപറമ്പിൽ ജോസഫാണ്​ (ഔസേപ്പച്ചൻ -58) മരിച്ചത്. അസം സ്വദേശികളായ ലോഗോൺ കിഷ്‌കു (30), റോബി റാം സോറൻ (21) എന്നിവർക്ക്​ പരിക്കേറ്റു. പന്തൽ പണിക്കാരാണ് ഇവർ. പള്ളിയുടെ മേൽക്കൂരയിൽ അറ്റകുറ്റപ്പണിക്ക്​ കയറിയതായിരുന്നു മൂന്നുപേരും. പണിക്കിടെ പിടിവിട്ട് താഴെ വീഴുകയായിരുന്നു. മേൽക്കൂര നീക്കുന്നതിനിടെ ഉണ്ടായ തകരാറാണ് അപകടത്തിന് കാരണമെന്ന് കടുത്തുരുത്തി പൊലീസ് പറഞ്ഞു.

അപകടത്തിൽപ്പെട്ട മൂന്നുപേരെയും സമീപത്തെ ആശുപത്രിയിൽ എത്തിച്ചെങ്കിലും ജോസഫിന്‍റെ ജീവൻ രക്ഷിക്കാനായില്ല. പരിക്കേറ്റ ഒരാളുടെ നില ഗുരുതരമാണ്.