ലിവ് ഇൻ പങ്കാളിയെയും മൂന്നു വയസ്സുകാരൻ മകനെയും കൊന്ന് 30കാരൻ ജീവനൊടുക്കി

നാഗ്പൂർ: ലിവ് ഇൻ പങ്കാളിയായ യുവതിയെയും മൂന്നു വയസ്സുകാരൻ മകനെയും കൊന്ന് 30കാരൻ ജീവനൊടുക്കി. മഹാരാഷ്ട്രയിലെ നാഗ്പൂരിലെ ഹോട്ടൽ മുറിയിലാണ് മൂവരുടെയും മൃതദേഹം കണ്ടെത്തിയത്.

വിനോദ് കുമാർ റൗത്ത്, നസ്നിൻ (29), മകൻ യുഗ് എന്നിവരാണ് മരിച്ചത്. വിനോദ് കുമാർ ഫാനിൽ തൂങ്ങിയ നിലയിലായിരുന്നു. നസ്നിനെ ഹാമർ കൊണ്ട് തലക്കടിച്ചാണ് കൊലപ്പെടുത്തിയത്. കുഞ്ഞിന്‍റെ മൃതദേഹത്തിൽ മുറിവൊന്നും ഇല്ലെന്നും പൊലീസ് പറഞ്ഞു.

ട്രക്ക് ഡ്രൈവറായിരുന്നു വിനോദ് കുമാർ. ഇയാൾക്ക് ഭാര്യയും രണ്ട് കുട്ടികളുമുണ്ട്. വിവാഹമോചനം നേടാതെ മധ്യപ്രദേശുകാരിയായ നസ്നിനുമൊത്ത് ഒരുമിച്ച് ജീവിതം ആരംഭിക്കുകയായിരുന്നു.

പിന്നീട് നസ്നിനെ ഒഴിവാക്കാൻ വിനോദ് കുമാർ ശ്രമം തുടങ്ങി. ഇവർക്കിടയിൽ വഴക്കും പതിവായി. ഇതിനിടയിൽ വേർപിരിയാൻ ഇരുവരും തീരുമാനിച്ചിരുന്നെന്നും പൊലീസ് അന്വേഷണത്തിൽ വ്യക്തമായി.