ഞാറ് നടാൻ ആളെ കിട്ടുന്നില്ല; കർഷക​െൻറ ഒറ്റയാൾ പോരാട്ടം

കൽപറ്റ: കൃഷിക്ക്​ പ്രോൽസാഹനം, സ്വയംപര്യാപ്​ത എന്ന സർക്കാർ കസർത്തുകൾക്കുമുന്നിൽ വയനാട്​ കോട്ടത്തറ കരിഞ്ഞകുന്നിലെ പാലക്കൽ സലാമി​െൻറ അനുഭവം മറിച്ചാണ്​.

കൃഷിയെക്കുറിച്ച്​ പറയാൻ കൃഷി വകുപ്പിന്​ ആയിരം നാവാണ്​. എന്നാൽ സലാം കൃഷിയിടത്തിൽ നിന്ന്​ പരാതി പറയാൻ എത്തിയത്​ കുറേ ഞാറുമായാണ്​. അതൊരു ഒറ്റയാൾ പോരാട്ടമായി.

കൃഷിയുടെ പേരിൽ വാചകമടി സലാമും കു​േറ കേട്ടതാണ്​. എന്നാൽ വയലിൽ ഞാറ് പറിക്കാനും നടാനും ആളെ കിട്ടുന്നില്ല; പിന്നെ എങ്ങനെ നെല്ല്​ വിളയും ? കന്നുകാലി സംരക്ഷണത്തിന്​ പിന്തുണ കിട്ടുന്നില്ലെന്നും പരാതി.

സലാം മാതൃക കർഷകനാണ്. അഞ്ച് ഏക്കർ കരഭൂമിയിൽ നട്ടുപിടിപ്പിക്കാത്തതായി ഒന്നുമില്ല. കാപ്പി, കുരുമുളക്​, കവുങ്ങ്​, തെങ്ങ്​, വാഴ, ചേമ്പ്​, ചേന ഇങ്ങനെ എല്ലാ വിളകളും കൃഷിചെയ്യുന്നുണ്ട്​. ജൈവകൃഷിയിലാണ്​ താൽപര്യം. പശുക്കളെയും വളർത്തുന്ന​ുന്നുണ്ട്​. ഒന്നര ഏക്കറിലാണ്​ നെൽകൃഷി.

എന്നാൽ, ഇത്തവണ പ്രതീക്ഷ കരിയുമെന്നായപ്പോഴാണ്​ സലാം സമരവുമായി വെള്ളിയാഴ്​ച രാവിലെ വെണ്ണിയോട് ടൗണിലെത്തിയത്. സാധാരണ സമരം ചെയ്​ത്​ സമയം കളഞ്ഞ ശീലമില്ല. എല്ലാവരും തൊഴിലുറപ്പിനു പിന്നാലെയാണ്​. ആ തൊഴിലാളികളെ കൃഷിയിടങ്ങളിലേക്ക് തിരിച്ചുവിടണമെന്ന് സലാം അധികൃതരോട്​ പറഞ്ഞെങ്കിലും ഫലമില്ല.

അടിയന്തര സമയങ്ങളിൽ മൃഗാശുപത്രിയിൽ പോയി മരുന്ന് ചോദിച്ചാൽ നല്ല മറുപടിപോലും കിട്ടാറില്ലെന്ന്​ സലാം പറഞ്ഞു.

കോട്ടത്തറ വില്ലേജ് പരിസരത്ത് നിന്ന്​ പ്ലക്കാർഡും ഞാറും കൈയിലേന്തി ഗ്രാമപഞ്ചായത്ത് ഓഫീസ്പടിക്കൽ പോയി പ്രതിഷേധം പ്രകടിപ്പിച്ചു. ഇവിടെയും​ അധികൃതർക്ക്​ ഇളക്കമില്ല. കുറേ നേരം നിന്നു. പിന്നെ സലാം കൃഷിയിടത്തിലേക്ക്​ മടങ്ങി.