കുന്നംകുളം : ഭാരതീയ ജനതാ പാർട്ടി സംസ്ഥാന അധ്യക്ഷൻ കെ സുരേന്ദ്രൻ, മലങ്കര ഓർത്തഡോക്സ് സഭയുടെ കുന്നംകുളം - ആർത്താറ്റ് ഭദ്രാസനത്തിൽ എത്തി സഹായ മെത്രാപ്പോലീത്തയെ സന്ദർശിച്ച് കൂടികാഴ്ച നടത്തി.
അഹമ്മദാബാദ് ഭദ്രാസനാധിപനും കുന്നംകുളം സഹായ മെത്രാപ്പോലീത്തയും മാധ്യമ വിഭാഗം അധ്യക്ഷനുമായ പുലിക്കോട്ടിൽ ഡോ ഗീവർഗീസ് മാർ യൂലിയോസിനെ സന്ദർശിച്ചു. ബി. ജെ. പി ജില്ലാ പ്രസിഡൻറ് അഡ്വ കെ.കെ അനീഷ് കുമാർ, സംസ്ഥാന കമ്മിറ്റി അംഗവും മലങ്കര സഭ ചെങ്ങന്നൂർ ഭദ്രാസന കൗൺസിൽ അംഗവുമായ സജി മാത്യു, സഭ മാനേജിംഗ് കമ്മറ്റി അംഗം അഡ്വ.മാത്യൂസ് മാടത്തേത്ത് എന്നിവരോടൊപ്പമാണ് സംസ്ഥാന അധ്യക്ഷൻ ഭദ്രാസനത്തിലെത്തിയത്.
സഭ പരമാധ്യക്ഷൻ മാർ ബസ്സേലിയോസ് മാർത്തോമ്മാ പൗലൂസ് ദ്വിതീയൻ കാതോലിക്കാ ബാവായുടെ സ്നേഹാന്വേഷണങ്ങൾ യൂലിയോസ് മെത്രാപ്പോലീത്ത അതിഥികളെ അറിയിക്കുകയും സംസ്ഥാന പ്രസിഡൻ്റായ സുരേന്ദ്രനെ പൊന്നാടയണിയിച്ച് ആദരിക്കുകയും ചെയ്തു. മലങ്കര സഭാ ചരിത്ര പുസ്തകങ്ങൾ മെത്രാപ്പോലീത്ത സമ്മാനിച്ചു.
2017 ജൂലൈ മൂന്നിലെ വിധി ഉൾപ്പെടെ സുപ്രീം കോടതിയുടെ വിവിധ വിധികൾ നടപ്പാക്കുന്ന കാര്യത്തിൽ ഇടത്-വലത് സർക്കാരുകൾ മലങ്കര സഭയോട് ഇന്നും അവഗണന കാട്ടുന്നതായി മെത്രാപ്പോലീത്ത വ്യക്തമാക്കി.
കുന്നംകുളം ഭദ്രാസന സെക്രട്ടറി ഫാദർ ജോസഫ് ചെറുവത്തൂർ, ഫാദർ ഗീവർഗ്ഗീസ് കാട്ടിൽ, കുന്നംകുളം ഭദ്രാസന കൗൺസിൽ അംഗം അഡ്വ.ഗിൽബർട്ട് ചീരൻ എന്നിവർ സന്നിഹിതരായിരുന്നു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.