കുടിവെള്ള കണക്​ഷനില്ല; അംഗൻവാടി കുട്ടികളും ജീവനക്കാരും ദുരിതത്തിൽ

വടശ്ശേരിക്കര: നവീകരിച്ച കെട്ടിടവും ജീവനക്കാരുമെല്ലാം ഉണ്ടെങ്കിലും കുടിവെള്ളത്തിനായുള്ള പൈപ്പ് കണക്ഷൻ സ്ഥാപിക്കാത്തത്​ വടശ്ശേരിക്കര ഇടക്കുളം 35ാം നമ്പർ അംഗൻവാടിയിലെ കൊച്ചുകുട്ടികളെയും ജീവനക്കാരെയും ഏറെ ബുദ്ധിമുട്ടിക്കുന്നു. 11 കുട്ടികളുള്ള പുതുക്കിയ അംഗൻവാടി കെട്ടിടം ഒരുവർഷം മുമ്പാണ് പ്രവർത്തനം ആരംഭിക്കുന്നത്. മറ്റ് അടിസ്ഥാന സൗകര്യങ്ങളെല്ലാം ഒരുക്കിയിരുന്നെങ്കിലും വെള്ളത്തിനുള്ള മാർഗം തുടക്കം മുതലേ ഇല്ലായിരുന്നു. ഉടൻതന്നെ പൈപ്പ് കണക്​ഷൻ സ്ഥാപിക്കുമെന്ന് അധികൃതർ ആവർത്തിക്കുന്നുണ്ടെങ്കിലും നാളിതുവരെയായി നടപടിയൊന്നുമായില്ല. നിലവിൽ അംഗൻവാടി ജീവനക്കാർ പുറത്തുനിന്ന് വെള്ളം പണം കൊടുത്ത് വാങ്ങിയാണ് സ്ഥാപനത്തിലെ ആവശ്യങ്ങൾ നിറവേറ്റുന്നത്. പുതുക്കിയ അംഗൻവാടി കെട്ടിടത്തിന് ചുറ്റുമതിലുണ്ടെങ്കിലും അതിന്​ ഗേറ്റ് സ്ഥാപിക്കാത്തതിനാൽ ജീവനക്കാർക്ക് കുട്ടികളെ ഇരുത്തിയിട്ട് വെള്ളമെടുക്കാൻ പുറത്തേക്ക് പോകാൻ കഴിയാത്ത അവസ്ഥയുമാണ്. പടം: കുടിവെള്ളമില്ലാത്ത ഇടക്കുളം അംഗൻവാടി