നദികളിൽ ജലനിരപ്പ്​ താഴ്ന്നു ഡാമുകൾ തുറന്നെങ്കിലും ഭീഷണിയില്ല

പത്തനംതിട്ട: മഴയുടെ ശക്തി കുറഞ്ഞതോടെ ജില്ലയിലെ പ്രളയബാധിത മേഖലകളിൽ ആശ്വാസം. ദുരിതബാധിതർക്കായി തുറന്ന പല ക്യാമ്പുകളും നിർത്തലാക്കി. നിലവിൽ ജില്ലയിലെ 48 ദുരിതാശ്വാസ ക്യാമ്പിലായി കഴിയുന്നത് 2102 പേരാണ്​. ഇതില്‍ 626 കുടുംബങ്ങളിലെ 845 പുരുഷന്മാരും 933 സ്ത്രീകളും 324 കുട്ടികളും ഉള്‍പ്പെടുന്നു. തിരുവല്ല താലൂക്കിലാണ് ഏറ്റവും കൂടുതല്‍ ക്യാമ്പുകളുള്ളത്. ഇവിടെ 38 ക്യാമ്പിലായി 1805 പേര്‍ കഴിയുന്നു. ​ നദികളിൽ ജലനിരപ്പ്​ കാര്യമായി കുറഞ്ഞിട്ടുണ്ട്​. ഡാമുകൾ തുറന്നുവി​ട്ടെങ്കിലും തീ​രങ്ങളിൽ കാര്യമായ ഭീഷണിയില്ല. കക്കി- ആനത്തോട് ഡാമി‍ൻെറ നാല്​ ഷട്ടർ തിങ്കളാഴ്ച രാവിലെ 11നാണ്​ തുറന്നത്​. 60 സെന്‍റീമീറ്ററാണ് ഷട്ടറുകള്‍ ഉയര്‍ത്തിയിട്ടുള്ളത്. നിലവില്‍ 72 ക്യുമെക്‌സ് ജലമാണ് പമ്പാനദിയിലേക്ക് ഒഴുക്കിവിടുന്നത്. ഷട്ടറുകള്‍ തുറക്കുന്നത് നേരിട്ട് നിരീക്ഷിക്കാന്‍ കലക്ടര്‍ ഡോ. ദിവ്യ എസ്. അയ്യര്‍ സ്ഥലത്ത് എത്തിയിരുന്നു. പമ്പ ഡാമിന്റെ രണ്ട് ഷട്ടർ തിങ്കളാഴ്ച വൈകീട്ട്​ നാലിന് ശേഷമാണ് തുറന്നത്. 30 സെ.മീ. വീതം തുറന്ന് 25 ക്യുമെക്‌സ് ജലമാണ്​ പമ്പാനദിയിലേക്ക് ഒഴുക്കുന്നത്​. ആവശ്യമെങ്കില്‍ ഇരു ഷട്ടറും 60 സെ.മീ. വരെ ഉയര്‍ത്തി പരമാവധി 50 ക്യുമെക്‌സ് ജലം പുറത്തേക്ക് ഒഴുക്കാനാണ്​ തീരുമാനം. ഇതുമൂലം ജനവാസ മേഖലകളില്‍ പരമാവധി 10 സെ.മീ. വരെയാകും ജലനിരപ്പ് ഉയരുക. ഈ സാഹചര്യത്തില്‍ പമ്പാനദിയുടെയും കക്കാട്ടാറിന്റെയും ഇരുകരയിലും താമസിക്കുന്നവരും പൊതുജനങ്ങളും സുരക്ഷ ഉറപ്പുവരുത്തണമെന്നും ജാഗ്രത പുലര്‍ത്തണമെന്നും കലക്ടർ അറിയിച്ചു. നദികളില്‍ ഇറങ്ങുന്നത് ഏതു സാഹചര്യത്തിലും ഒഴിവാക്കേണ്ടതാണ്. PTL 11 kakki anathodu കക്കി- ആനത്തോട് ഡാമി‍ൻെറ ഷട്ടര്‍ തുറന്ന് പുറത്തേക്ക് ജലം ഒഴുക്കുന്നു