എൻ.എസ്.എസിന്‍റെ പത്മ കഫെ തുറന്നു

പത്തനംതിട്ട: എൻ.എസ്.എസ് പത്തനംതിട്ട താലൂക്ക് യൂനിയന്‍റെ നേതൃത്വത്തിൽ സ്റ്റേഡിയം ജങ്​ഷനിൽ ആരംഭിച്ച വെജിറ്റേറിയൻ റസ്റ്റാറന്‍റ്​ പത്മ കഫെയുടെ ഉദ്ഘാടനം എൻ.എസ്.എസ് ജനറൽ സെക്രട്ടറി ജി.സുകുമാരൻ നായർ നിർവഹിച്ചു. പ്രസിഡന്‍റ്​ അഡ്വ. നരേന്ദ്രനാഥൻ നായർ, യൂനിയൻ പ്രസിഡന്‍റ്​ അഡ്വ. ആർ. ഹരിദാസ് ഇടത്തിട്ട, സെക്രട്ടറി വി.ആർ. സുനിൽ തുടങ്ങിയവർ പ​​ങ്കെടുത്തു. എൻ.എസ്.എസ് നേതൃത്വം ആരംഭിച്ചിട്ടുള്ള വനിത ശാക്തീകരണ പദ്ധതികളുടെ ഭാഗമായാണ് പത്മ കഫെ ആരംഭിച്ചത്. മന്നം സോഷ്യൽ സർവിസ് സൊസൈറ്റിയുടെ നേതൃത്വത്തിൽ പ്രവർത്തിക്കുന്ന 300 സ്വയം സഹായ സഹകരണ സംഘങ്ങളിൽനിന്ന്​ തെരഞ്ഞെടുത്ത് പരിശീലിപ്പിച്ച 30 വനിതകളുടെ മേൽനോട്ടത്തിലാണ് കഫെ പ്രവർത്തിക്കുക. 75 ലക്ഷം രൂപ ചെലവിലാണ് കഫെ തുടങ്ങിയിട്ടുള്ളത്. രാവിലെ ഏഴുമുതൽ രാത്രി ഒമ്പതുവരെ പ്രവർത്തിക്കും. പാചകത്തിന്​ യന്ത്രസാമഗ്രികളാണ് ഉപയോഗിക്കുന്നത്. പത്തനംതിട്ട യൂനിയൻ അങ്കണത്തിൽ നിർമിച്ച മന്നത്ത് പത്മനാഭൻ സ്മൃതി മണ്ഡപത്തിന്‍റെ അനാച്ഛാദനവും ജനറൽ സെക്രട്ടറി നിർവഹിച്ചു. മുസ്​ലിം ലീഗ് പ്രവർത്തക കൺവെൻഷൻ ഇന്ന്​ പത്തനംതിട്ട: മുസ്​ലിം ലീഗ് സംസ്ഥാന അധ്യക്ഷൻ പാണക്കാട് സാദിഖലി ശിഹാബ് തങ്ങൾ വ്യാഴാഴ്​ച പത്തനംതിട്ടയിലെത്തും. പുതിയ സംസ്ഥാന അധ്യക്ഷൻ എല്ലാ ജില്ലകളിലുമെത്തി പൊതുസമൂഹത്തിൽ വിവിധ തുറകളിൽ പ്രവർത്തിക്കുന്നവരുമായി നടത്തുന്ന ആശയ സംവാദത്തിന്‍റെ ഭാഗമായാണ് വ്യാഴാഴ്ച പത്തനംതിട്ടയിലെത്തുന്നതെന്ന് മുസ്​ലിം ലീഗ് സംസ്ഥാന വക്താവ് ഷാഫി ചാലിയം വാർത്തസമ്മേളനത്തിൽ പറഞ്ഞു. രാവിലെ 10.30ന് കിഴക്കേടത്ത് മറിയം കോംപ്ലക്സിൽ മത, സാംസ്കാരിക, സാമൂഹിക നേതാക്കളുടെ സംഗമം. ഉച്ചക്ക്​ 2.30ന് അബാൻ ആർക്കേഡിൽ ജില്ല പ്രവർത്തക കൺവെൻഷനിലും സംസ്ഥാന അധ്യക്ഷൻ പങ്കെടുക്കും. ലീഗ് ദേശീയ ജനറൽ സെക്രട്ടറി പി.കെ. കുഞ്ഞാലിക്കുട്ടി എം.എൽ.എ, ജനറൽ സെക്രട്ടറി പി.എം.എ. സലാം, അബീദ് ഹുസൈൻ തങ്ങൾ എം.എൽ.‌എ, അബ്ദുറഹ്​മാൻ രണ്ടത്താണി, സംസ്ഥാന ഉപാധ്യക്ഷൻ കെ.ഇ. അബ്ദുറഹ്​മാൻ, എം.എസ്.എഫ് സംസ്ഥാന പ്രസിഡന്‍റ് പി.കെ. നവാസ് തുടങ്ങിയവർ പങ്കെടുക്കും. വാർത്തസമ്മേളനത്തിൽ ജില്ല പ്രസിഡന്‍റ് ടി.എം. ഹമീദ്, ജനറൽ സെക്രട്ടറി സമദ് മേപ്രത്ത്, വൈസ് പ്രസിഡന്‍റ് എൻ.എ. നൈസാം എന്നിവരും പങ്കെടുത്തു.