സുബ്രതോ കപ്പ്​: ഇരട്ടനേട്ടത്തിൽ തല ഉയർത്തി മലപ്പുറം

സുബ്രതോ കപ്പ്​: ഇരട്ട നേട്ടത്തിൽ തല ഉയർത്തി മലപ്പുറം മലപ്പുറം: സംസ്ഥാന സുബ്രതോ കപ്പ് ഫുട്ബാൾ ടൂർണമെന്‍റിൽ ആൺകുട്ടികളുടെ ജൂനിയർ വിഭാഗത്തിലും സബ്​ ജൂനിയർ വിഭാഗത്തിലും ജേതാക്കളായി മലപ്പുറത്തിന്​ ഇരട്ടി സന്തോഷം. സ്വാതന്ത്ര്യദിനത്തിൽ നടന്ന ജൂനിയർ വിഭാഗം ഫൈനലിൽ കോഴിക്കോടിനെയും സബ്​ ജൂനിയർ വിഭാഗത്തിൽ പാലക്കാടിനെയുമാണ്​ ആതിഥേയർ തറപറ്റിച്ചത്​. മലപ്പുറത്തിനായി ബൂട്ട്​ കെട്ടിയ എം.ഐ.സി അത്താണിക്കൽ ഇംഗീഷ്​ മീഡിയം സ്കൂളും സബ്​ജൂനിയർ വിഭാഗത്തിൽ മത്സരിച്ച ചേലേമ്പ്ര എൻ.എം.എച്ച്​.എസ്​.എസും ടൂർണമെന്‍റിലുടനീളം എതിരാളികൾക്കെതിരെ ഏകപക്ഷീയ മുന്നേറ്റമാണ്​ നടത്തിയത്​. വിജയികൾക്ക് പി. ഉബൈദുല്ല എം.എൽ.എ ട്രോഫികൾ നൽകി. അബ്ദുറഹ്മാൻ പാലോളി, മലപ്പുറം ഡി.ഡി.ഇ കെ.പി. രമേഷ് കുമാർ, സംസ്ഥാന സ്പോർട്സ് ഓർഗനൈസർ ഹരീഷ് ശങ്കർ, ​കെ.വി. മുഹമ്മദ് ശരീഫ്, ഡി.ടി. മുജീബ്, സുന്ദര രാജ്, വിജീഷ് എന്നിവർ സമ്മാനദാന ചടങ്ങിൽ പങ്കെടുത്തു. സുബ്രതോകപ്പ്​: എം.​​ഐ.സി സ്കൂളിന്‍റേത്​​ അഭിമാനനേട്ടം - സുബ്രതോകപ്പ്​ സംസ്ഥാനതല ​ജേതാക്കളാകുന്ന ആദ്യ അൺ എയ്​ഡസ്​ സ്കൂൾ മലപ്പുറം: സുബ്രതോ കപ്പ്​ ഫുട്​ബാൾ ടൂർണ​മെന്‍റിൽ ജേതാവായ അത്താണിക്കൽ എം.ഐ.സി ഇംഗ്ലീഷ്​ മീഡിയം സ്കൂളിന്​ അഭിമാന നേട്ടം. സുബ്രതോ ടൂർണമെന്‍റിൽ അൺ എയ്​ഡഡ്​ വിഭാഗത്തിൽ സംസ്ഥാനത്തുനിന്ന്​ ദേശീയ യോഗ്യത ആദ്യ സ്കൂളെന്ന ചരിത്രനേട്ടം നേടിയിരിക്കുകയാണ്​ എം.ഐ.സി. തിങ്കളാഴ്ച നടന്ന ജൂനിയർ വിഭാഗം ഫൈനലിൽ ഏകപക്ഷീയമായ മൂന്ന്​ ഗോളിന്​ കോഴിക്കോടിനെ തോൽപിച്ചാണ്​ ഐ.​ഐ.സി ജേതാക്കളായത്​. സെമിയിൽ കാസർകോടിനെയും ക്വാർട്ടറിൽ ആലപ്പുഴയെയും എതിരില്ലാത്ത നാല്​ ഗോളുകൾക്കും പരാജയപ്പെടുത്തിയാണ്​ മലപ്പുറത്തിനായി ബൂട്ടണിഞ്ഞ എം.ഐ.സി സ്കൂൾ ഫൈനൽ പോരാട്ടത്തിനെത്തിയത്​. ടൂർണമെന്‍റിന്‍റെ ആദ്യ റൗണ്ടിൽ പാലക്കാടിനെ എതിരില്ലാത്ത ഏഴ്​ ഗോളുകൾക്ക്​ തറപറ്റിച്ച്​ ടീമിന്‍റെ കരുത്ത്​ തെളിയിച്ചിരുന്നു. കൃത്യമായ പൊസിഷനുകളിൽ കളിക്കാരെ വിന്യസിച്ച്​ മികച്ച കളിയാണ്​ എം.​ഐ.സി പുറത്തെടു​ത്തത്​. കളിച്ച നാല്​ കളികളിൽ എതിർ വലയിൽ 18 ഗോളുകൾ തൊടുത്തുവിട്ട എം.​ഐ.സി ഒരു ഗോൾപോലും ടൂർണമെന്‍റിൽ വഴങ്ങി​യില്ലെന്നത്​ ജില്ലക്കും സ്കൂളിനും അഭിമാനനേട്ടമായി. photo: mpg ma2 ------------------