കോൺക്രീറ്റ് സ്ലാബ് തകർന്നു; മരച്ചില്ലകൾ വെച്ച് നാട്ടുകാർ

കുന്ദമംഗലം: പുതിയ ബസ് സ്റ്റാൻഡിൽ ബസുകൾ പുറത്തേക്കെടുക്കുന്ന ഭാഗത്ത് കോൺക്രീറ്റ് സ്ലാബ് തകർന്ന് അപകട കുഴി രൂപപ്പെട്ടത് ദിവസങ്ങളായി മാറ്റിയിട്ടില്ല. ദിനംപ്രതി നിരവധി യാത്രക്കാരും വാഹനങ്ങളും കടന്നുപോകുന്ന സ്ഥലത്താണ് കുഴി രൂപപ്പെട്ടത്. ഇത് യാത്രക്കാർക്കും വാഹനങ്ങൾക്കും ഒരുപോലെ ഭീഷണിയാണ്. നിരന്തരം വാഹനങ്ങൾ കയറിയിറങ്ങുന്നതിനാൽ പഴകി ദ്രവിച്ചാണ് സ്ലാബിൽ കുഴി രൂപപ്പെട്ടത്. നാട്ടുകാർ കുഴിയുടെ മുകളിൽ മരച്ചില്ലകൾ വെച്ചിട്ടുണ്ട്. ദിവസങ്ങൾക്ക് മുമ്പ് ശ്രദ്ധയിൽപെട്ട കുഴി ഇതുവരെ അടച്ചിട്ടില്ല. പുതിയ കോൺക്രീറ്റ് സ്ലാബ് സ്ഥാപിക്കാൻ അധികൃതർ വേഗത്തിൽ നടപടിയെടുത്തില്ലെങ്കിൽ അപകടസാധ്യത കൂടുതൽ ആണ്.