വിലങ്ങാട് മലയിൽ കനത്തമഴ പുഴയിൽ വെള്ളമേറുന്നു

നാദാപുരം: കാലവർഷത്തിന്റെ മുന്നോടിയായി വൈകീട്ട് മൂന്നോടെ വിലങ്ങാട് മലയോരത്ത് ആരംഭിച്ച കനത്ത മഴ രാത്രിയിലും തുടരുന്നു. മയ്യഴിപ്പുഴയുടെ പ്രഭവകേന്ദ്രമായ വിലങ്ങാട്പുഴയിൽ ജലനിരപ്പ് ഉയർന്നു. ഇതോടെ, പുഴയുടെ തീരങ്ങളിൽ റവന്യൂ വകുപ്പ് ജാഗ്രത നിർദേശം നൽകി. മലയോരത്ത് അടിയന്തര സുരക്ഷ നടപടികൾ സ്വീകരിക്കാൻ ജാഗ്രത സമിതികൾ പ്രവർത്തനം ആരംഭിച്ചു. ടൗണിന് സമീപത്തെ ചെറുതോട്ടുകളിൽ വെള്ളം കവിഞ്ഞൊഴുകുന്നതായി നാട്ടുകാർ അറിയിച്ചു. വായാട് ഭാഗത്തുണ്ടായ കനത്തമഴയാണ് നീരൊഴുക്ക് വർധിപ്പിച്ചത്.