പാലുകാച്ചിയിലും പുരളിമലയിലും തിരക്കേറുന്നു

ഉരുവച്ചാൽ: പണിമുടക്ക് ദിനത്തിൽ പാലുകാച്ചിയിലും പുരളിമലയിലും സന്ദർശകരുടെ തിരക്ക്​. വിനോദ സഞ്ചാരികൾക്ക് പ്രകൃതിയെ അടുത്തറിയാൻ ഉതകുന്ന വൈവിധ്യങ്ങളുടെ കലവറയാണ് മാലൂർ പഞ്ചായത്തിലെ ശിവപുരത്തിനടുത്ത പാലുകാച്ചിയും മാലൂർ പുരളി മലയും. സമുദ്രനിരപ്പിൽ നിന്ന് 3000ത്തോളം അടി ഉയരത്തിൽ നിൽക്കുന്ന പാലുകാച്ചിപ്പാറയുടെ സൗന്ദര്യം കാണാൻ നിരവധി പേരാണ്​ എത്തുന്നത്​. ലോക്​ഡൗണിൽ ഇളവുവന്നതോടെയാണ് സഞ്ചാരികളുടെ ഒഴുക്ക്​ വർധിച്ചത്​. കൊട്ടിയൂർ തീർഥാടനവുമായി ഐതിഹ്യബന്ധമുള്ള സ്ഥലമായതിനാൽ ഒട്ടേറെ സന്ദർശകരാണ് ഇവിടെ എത്തുന്നത്. പുരളിമല അപൂർവ സസ്യങ്ങളുടെയും പക്ഷികളുടെയും ആവാസകേന്ദ്രമാണ്.