ജില്ലയിൽ രണ്ട്​ ലഹരിമുക്ത കേന്ദ്രങ്ങൾ തുറക്കുന്നു

* അടിമാലിയിലും നെടുങ്കണ്ടത്തുമാണ്​ കേന്ദ്രങ്ങൾ വരുന്നത്​ തൊടുപുഴ: ജില്ലയിൽ അടിമാലിയിലും നെടുങ്കണ്ടത്തും ലഹരിമുക്ത കേന്ദ്രങ്ങൾ തുറക്കുന്നു. നിലവിലെ കേന്ദ്രങ്ങളിലെ തിരക്കേറിവരുന്ന സാഹചര്യത്തിലാണ്​ സർക്കാർ നിർദേശപ്രകാരം ജില്ലയിൽ രണ്ട്​ കേന്ദ്രങ്ങൾകൂടി തുറക്കാനുള്ള നടപടി ആരംഭിച്ചത്​. നിലവിൽ ചെറുതോണി ജില്ല ആശുപത്രിയിലാണ്​ ഏക കേന്ദ്രം പ്രവർത്തിക്കുന്നത്​. ലഹരിക്കെതിരെ എക്‌സൈസ് വകുപ്പ് ആവിഷ്‌കരിച്ച വിമുക്തി പദ്ധതിയുടെ ഭാഗമായി ആരോഗ്യവകുപ്പി​ൻെറ കീഴിലെ ജില്ല താലൂക്ക് ആശുപത്രികളില്‍ ലഭ്യമായ സ്ഥലങ്ങളിലാണ് ഇവ പ്രവര്‍ത്തിക്കുന്നത്. ഒ.പി സേവനം, കൗണ്‍സിലിങ്​​, മരുന്നുകള്‍, മാനസിക ഉല്ലാസത്തിനുള്ള സൗകര്യം യോഗ, ലഹരിയില്‍നിന്ന്​ മോചനം നേടുന്നവര്‍ അനുഭവിക്കുന്ന പ്രശ്‌നങ്ങള്‍ക്ക് പ്രത്യേക കരുതല്‍ എന്നീ സേവനങ്ങൾ നൽകുന്നുണ്ട്​. അമിത ലഹരി ഉപയോഗത്തെ തുടർന്ന്​ ഒരു വ്യക്തിയെ ഒറ്റപ്പെടുത്തുന്ന സാഹചര്യം ഇല്ലാതാക്കി അവരെ സാമൂഹിക ജീവിതത്തിലേക്ക് തിരിച്ചുകൊണ്ടുവരാനാണ് ശ്രമിക്കുന്നത്. എക്​സൈസി​ൻെറയും ആരോഗ്യവകുപ്പി​ൻെറയും സഹകരണത്തോടെ കൃത്യമായ ചികിത്സനല്‍കി അവരെ ആരോഗ്യകരമായ സാമൂഹിക ജീവിതം നയിക്കാന്‍ പ്രാപ്തരാക്കുകയും ഇതിലൂടെ ലക്ഷ്യമിടുന്നു. എക്‌സൈസ് പരിശോധനകളിലും മറ്റും പിടിയിലാകുന്ന ലഹരിക്കടിമയായവരെ ഇവിടെ ചികിത്സിക്കാൻ സംവിധാനങ്ങളുണ്ട്​. ലഹരിക്കെതിരെ ക്രിയാത്മകമായ ചുവടു​വെപ്പുകള്‍, വിദ്യാഭ്യാസ സംസ്ഥാനതല പ്രവര്‍ത്തനങ്ങള്‍, മദ്യംമയക്കുമരുന്ന് ഉപയോഗിച്ചുതുടങ്ങിയവരെ തിരുത്തുക, ലഹരി ഉൽപന്നങ്ങളുടെ ലഭ്യതയും വിപണനവും ഇല്ലാതാക്കല്‍, പുനരധിവാസം എന്നീ പ്രവര്‍ത്തനങ്ങളാണ് വിമുക്തിയിലൂടെ വിഭാവനം ചെയ്തത്. 1530 പേരാണ്​ ചെറുതോണിയിൽ പ്രവർത്തിക്കുന്ന ഡീ അഡിക്​ഷൻ സൻെററിൽനിന്ന്​ ലഹരിമുക്തരായി ഇതുവരെ പടിയിറങ്ങിയത്​. 4140 പേർക്ക്​ കൗൺസലിങ്ങും നൽകിയിട്ടുണ്ട്​. പുതിയ കേന്ദ്രങ്ങൾ നിർമിക്കുന്നതി​ൻെറ പ്രാഥമിക പരിശോധകൾ പൂർത്തിയായതായി​ എക്​സൈസ്​ ഡെപ്യൂട്ടി കമീഷ്​ണർ വി.എ. സലീം പറഞ്ഞു. പലയിടങ്ങളിലും ലഹരിക്കടിമപ്പെടുന്നവരെ കേന്ദ്രത്തിലെത്തിക്കാൻ ബുദ്ധിമുട്ട്​ നേരിടുന്ന സാഹചര്യത്തിൽ പ്രത്യേക ടാസ്​ക്​ ഫോഴ്​സും​ ജില്ലയിൽ രുപവത്​കരിക്കും​. ബന്ധുക്കളോ അതല്ലെങ്കിൽ രോഗിയോ വിളിച്ചാൽ ടാസ്​ക്​ ഫോഴ്​സുകാർ നേരി​ട്ടെത്തി അവരെ​ ലഹരിമുക്ത കേന്ദ്രത്തിൽ എത്തിക്കുമെന്ന്​ എക്സൈസ്​ അധികൃതർ പറഞ്ഞു. ----------------- ഓണം: പരിശോധനയുമായി എക്​സൈസും ഭക്ഷ്യസുരക്ഷ വകുപ്പും തൊടുപുഴ: ഒാണക്കാലത്തോട്​ അനുബന്ധിച്ച് ഭക്ഷ്യസുരക്ഷ വകുപ്പി​ൻെറയും എക്​സൈസി​ൻെറയും നേതൃത്വത്തില്‍ ജില്ലയിലുടനീളം പരിശോധനകള്‍ തുടങ്ങി. ഓരോ സർക്കിളുകൾ കേന്ദ്രീകരിച്ചാണ്​ പരിശോധന ആരംഭിച്ചത്​. പാല്‍, ശര്‍ക്കര, വെളിച്ചെണ്ണ, പച്ചക്കറികള്‍, പഴവർഗങ്ങള്‍, മത്സ്യം എന്നിവ ഭക്ഷ്യസുരക്ഷ വ്യാപക പരിശോധനക്ക് വിധേയമാക്കുന്നുണ്ട്. ഓണക്കാലത്ത് ഏറ്റവുമധികം വില്‍പന നടക്കുന്ന പാല്‍, ശര്‍ക്കര, കായവറുത്തത് എന്നിവയുടെ സാമ്പിളുകൾ എടുത്ത്​ പരിശോധന നടത്തിവരുന്നുണ്ട്​​. ഓണക്കിറ്റുകളിലേക്ക്​ കൊടുക്കുന്ന വിവിധ സാധനങ്ങളുടെ സാമ്പിളുകളും പരിശോധിക്കുന്നുണ്ട്​​​. അതിർത്തി കടന്നെത്തുന്ന പാലി​ൻെറ ഗുണനിലവാരം പരിശോധിക്കുന്നതടക്കം ജോലി ഉടൻ ആരംഭിക്കുമെന്ന്​ അസി. ഫുഡ്​ സേഫ്​റ്റി കമീഷണർ കെ.പി. രമേഷ്​ പറഞ്ഞു. ഇതുകൂടാതെ എക്​സൈസ്​ വകുപ്പും വ്യാപക പരിശോധനയുമായി രംഗത്തുണ്ട്​​. 24 മണിക്കൂറും പ്രവർത്തിക്കുന്ന കൺട്രോൾറൂം ഇതിനോടകം തുറന്നുകഴിഞ്ഞു​. പഴയ അബ്​കാരി കേസുകളിലെ കുറ്റവാളികളുടെ പട്ടികപ്രകാരം നിരീക്ഷണവും നടത്തുന്നുണ്ട്​​. ഓണവുമായി ബന്ധപ്പെട്ട്​ ജൂലൈ 24 മുതൽ ആഗസ്​റ്റ്​ 25 വരെ സ്​പെഷൽ ഡ്രൈവും നടത്തുന്നുണ്ട്​. അതിർത്തി മേഖലയിലെ ലഹരി കടത്തും മറ്റും തടയു​ന്നതിനായി തേനി എസ്​.പിയും ഇടുക്കി ഡെപ്യൂട്ടി കമീഷ്​ണറുമായി ജനുവരി പത്തിന്​ യോഗം ചേരും.