വാഴത്തോപ്പ് കെ.എസ്.ഇ.ബി കോളനിയില്‍ കുടിവെള്ളവിതരണം പുനരാരംഭിച്ചു

ചെറുതോണി: ജലവിതരണം നിലച്ച് ആറുദിവസത്തിനുശേഷം വാഴത്തോപ്പ് കെ.എസ്.ഇ.ബി കോളനിയില്‍ കുടിവെള്ളമെത്തി. വെള്ളം കിട്ടാതെ ഇവിടെ ഇരുന്നൂറോളം കുടുംബങ്ങൾ ദുരിതത്തിലായിരുന്നു. ചുമതലപ്പെട്ട ഉദ്യോഗസ്ഥരുടെ വീഴ്ചമൂലമാണ് കുടിവെള്ളം തടസ്സപ്പെടുന്നതെന്ന് താമസക്കാര്‍ പറയുന്നു. വിവിധ സ്ഥാപനങ്ങളില്‍ ജോലി ചെയ്യുന്നവരും പ്രളയക്കെടുതിയില്‍ വീട്​ നഷ്​ടപ്പെട്ടവരുമാണ് താമസിക്കുന്നത്. കുടുംബമായി താമസിക്കുന്ന ഇവര്‍ വെള്ളം കിട്ടാതായതോടെ മഴവെള്ളമുപയോഗിച്ചാണ് പ്രാഥമികാവശ്യങ്ങള്‍ നിര്‍വഹിച്ചിരുന്നത്. കുടിവെള്ളം ഒടുവിൽ വാഹനങ്ങളില്‍ വരുത്തിയിരുന്നു. ഇടുക്കി അണക്കെട്ടി‍ൻെറ നിര്‍മാണകാലത്ത് സ്ഥാപിച്ച പൈപ്പുകളാണ് കുടിവെള്ള വിതരണത്തിനുപയോഗിക്കുന്നത്. കാലപ്പഴക്കംമൂലം പൈപ്പ് പൊട്ടുന്നത് പതിവാണ്. അണക്കെട്ടില്‍നിന്ന്​ പമ്പ്​ ചെയ്യുന്ന വെള്ളമാണ് കോളനിയില്‍ കുടിവെള്ളത്തിനായി ഉപയോഗിക്കുന്നത്. പൈപ്പ്​ പൊട്ടല്‍ വ്യാപകമായതോടെ വര്‍ഷങ്ങളായി ആയിരക്കണക്കിന്​ ലിറ്റർ വെള്ളം പാഴായിപ്പോകുന്നുണ്ട്. വെള്ളം പാഴാകുന്നതിനാല്‍ അണക്കെട്ടിലെ വെള്ളമാണ് നഷ്​ടപ്പെടുന്നത്. ഇത്തരത്തില്‍ ബോര്‍ഡിന്​ നഷ്​ടമുണ്ടാകുന്നുണ്ടെങ്കിലും പൈപ്പ്​ മാറ്റാത്തതില്‍ ദുരൂഹതയുണ്ടെന്ന് താമസക്കാര്‍ പറയുന്നു. കെ.എസ്.ഇ.ബിയുടെ കൈവശമുള്ള സ്ഥലത്തി‍ൻെറ പകുതി ജില്ല പഞ്ചായത്തിന്​ വിട്ടുനല്‍കാന്‍ തീരുമാനമുണ്ടെങ്കിലും ഇതും നടപ്പാക്കിയിട്ടില്ല. കോളനിയിലെ തര്‍ക്കം മുതലെടുത്ത് കോളനിയിലെ ക്വാര്‍ട്ടേഴ്സുകള്‍ പലരും കൈയേറിയിട്ടുണ്ട്. ഉത്തരവാദികളില്ലാത്തതിനാല്‍ കോളനിയിലെ കെട്ടിടങ്ങളും പൊളിച്ചുകൊണ്ടുപോകുന്നുണ്ട്.